Proverbs 27:1-14

¹Ni anapeya ukurukse bitarko mu ko me gemang soraguk se kiring kaparukko, mu awuk, ni anapeya aitakta ni kema ko aratukko mu ni me ko ikisam.

²Ni keta nimi me patawurko; kariimet saki nip patawumonko.

³Manga se saun mu mel ikup ikup; bare kari ngualara mu gelegele kisa se gemang magara ko ikup mu, manga se saun ko ikup kiaram.

⁴Nangamang magara ko kilek mu kariimet saki nongomang maguwuso ale ikup nungarso; bare kari bo terong se ni mena nimi ikia, ale ko gemang magara, mu ko sokel mu kalel biya nunguningkiri.

⁵Bo ko memek wetang te la kua tui se maona mu kiwem ningo; bare kua tui se ko memek kaluwu lagara mu me sangukko.

⁶Ka tiran yawara mu ka memek wetang te la ka manuk se lot kisu kam ko yaman ikiko, bare mu ka sangukko; bare kari ni kerak memek mu den amilmil kisok ale gira awom ka yasi lagarukko, bare mu ko sinar toko!

⁷Kari na ko me kueso mu, na ningo ta wore am merukko; bare kari na ko kueso mu, na aguwaya ta wore am naukko.

⁸Ni ka wonong betesam ale awar lagasam, mu nika ariga inangnang bo ko singir beteram ale lagoso iwita.

⁹Mel siring yawara yawara mu gemang motam amilmil tuso; uwutatala, ka tiran yawara gomang motam lilim te den sangam kisiso mu gemang motam patawuso.

¹⁰Ni ka tiran yawara, se ka niet ko tiran yawara, mu me nunga bitarko; tom ikup arik ale ka launuria awar bagamon mu ka tiran pingi bagoso mu am ka sangukko.

¹¹Aga kuriang, ikia sinar karogo lager se ani angamang motam amilmil te lagarikko; se awiriya aninga balu maguwurok, bare ani amilmil te la koma balikko.

¹²Kari sinar mu ikup ari se mu, numi tagi batagarso ale kia kaposo; bare kari sinar mena mu ngual kasik geraga nama ningi kaposo ale memek arigiso.

¹³Kari bo ni ninguru me ko ikia agi mu, nika manga mel agi mu yam ngual me tuiko; ni gir ale noko guang ningo bo to ilup asele mel ko balso mu tuiko; se nu ko guang mu ko negeruk ale pasak tairuk ko ikup kutuwurokko.

¹⁴Tumong biyala kari sail ago turomola yawara tua, mu nu iki paguwurok ale ni gemang maga se manem i maukko.