PROVERBIORUM 24:27-32

²⁷Præpara foris opus tuum, et diligenter exerce agrum tuum, ut postea ædifices domum tuam.

²⁸Ne sis testis frustra contra proximum tuum, nec lactes quemquam labiis tuis.

²⁹Ne dicas: Quomodo fecit mihi, sic faciam ei; reddam unicuique secundum opus suum.

³⁰Per agrum hominis pigri transivi, et per vineam viri stulti:

³¹et ecce totum repleverant urticæ, et operuerant superficiem ejus spinæ, et maceria lapidum destructa erat.

³²Quod cum vidissem, posui in corde meo, et exemplo didici disciplinam.