Pris Sę Ebo Bomai Po 20:1-15

¹Te Genuai Bidigo Mosesbolo te tiwai po walali,

²“Nago Israel we bidi augwaliba te tiwai po wao, te dage Israel me deli, ma dage dali bidibo gasa hani me deli, agai aga wai te tibo god Molekbolo ofa tiwai mobaso da, teda dagego te bidi ela muao. Tigidali we bidigo agaba masigi sąnama, te aga isibo siba usu nao.

³Te bidigo wai te Molekba mabo kolesagade, te eno sel Ugwa Be meda ilama, te eno genuai nogi aiyaba mu elalubo sę ebao. Tibaso da, eno te bidiba boi bidi elama, te aga eno we bidi hani tomode bidibo sela sąwaibao.

⁴Tiali goli, te we bidi augwaligo te bidigo kolesaga suali, te augwaligo homude olo nai me tiwai da homu elama, te augwaligo aga me ela musiąbaso da,

⁵teda ena digi eno agaba boi bidi eyu, te aga deli hani bageba me te ena tudiba munama, te Molekba lotu wabo we bidi tigidaliba te tiwai yaibao. Te augwali eno we bidi hanide sela sąwaibao,” wali.

⁶“Te bidi me deli te kebele aubo bidiba pelama, te isali bidi noma bidi dali po mibo sę igi pabo sę ebo bidi yai baso da, teda te bidigo ena tagalama, te Godigo po odisąwai hanigo kolesaga wali pobao. Tibaso, eno agaba boi bidi eyu, te aga eno hani we bidide sela sąwaibao.

⁷Dage te tedali gasagi yai bidu tama sesemane sogo te eno godolo yabo wiegi yai doloba pai kolesagade bilao. Ena Genuai Bidi, ena duga God, eno te wai dao.

⁸Dagego eno bomai po tigidali wali pao, magi baso meni, ena Genuai Bidigo dage eno we bidi wiegi yai pedalumainu sa muai dao,” wali.

⁹“Te bidi me deligo me, o te we me deligo me, te aga ida ayabolo te dwai da te tiwai po weyu, ‘Godigo nage dolomainao,’ obaso da, teda dagego te bidi ma te we ela muao. Bidi ma wego te tobage po wali da, te aga yali sę dagede aga isimainao,” wali.

¹⁰“Te bidi me deligo abagi me deligo we penani yai baso da, teda dagego te bidi me te we dali si ela muao.

¹¹Te bidigo te aga ayago we me deli dali penani sę yai baso da, te bidigo aga aya dolobao. Tialima, augwaligo te bidi dali te we dali si ela muao. Augwali sigo dwai sę yali sęgę elalubao, tialima augwali si isimainao.

¹²Te bidi me deligo aga ogwago we dali penani ebaso da, teda dagego augwali si ela muao. Augwa si deli kanemego te penani yali, tialima augwali sigo dobo sę yali sęgę elalubaso, te augwali si isimainao.

¹³Te bidi mego gasa bidi me penani ebaso, augwali sigo dwai sę genuai mu yalio. Tialima, dagego augwali si ela muao. Augwa si yali sę dagede naga augwa si isibao.

¹⁴Te bidi me deligo te we me we aga ida dali sabo si da, te dagego augwali sela ela munama, augwa tigi isiba ulao, magi baso meni, augwaligo dwai sę genuai mu yali, tama dagego te tobage kolesaga dage tomode ebo we me bidi te sula tagaligio.

¹⁵Te bidi me deligo te kibu sibi me penani ebo bidi, dagego te bidi ela muyu, te kibu me ela muao.