LEVITIKO 20:1-15

¹Iehova ese Mose e hereva henia, eto,

²Israel taudia ma ba hamaorodia, baoto: Israel tauna ta eiava noho-hedoa tauna taese natuna na ḡole-oho boubouna ai baine halaoa, dirava koikoina Molek ena, ia na momokani baine mase: hanua taudia ese nadi amo bae hodoa mase.

³Lau danu vairagu baina ha-aukaia una tau enai, bona ena beseamo baina negea daure; badina be natuna na Molek e henia, unu amo ia ese lauegu gabu helaḡana vada e hamiroa, bona lau ladagu helaḡana vada e hahemaraia.

⁴A hanua taudia ese hari natuna Molek e henia tauna bema bogaia hisi, basiema hodoa mase,

⁵lau ese vairagu baina ha-aukaia una tau enai bona ena iduhu taudia iboudiai ediai; edia bese amo baina negea daure, ia bona ia ida Molek vairani, eha lebulebu taudia iboudiai danu.

⁶Rohe taudia bona mea taudia baine lao henidia bona idia ida baine kara havara tauna danu, lau ese vairagu baina ha-aukaia ienai, bona ena bese amo baina negea daure.

⁷Taunabunai, sibomui ba hahelaḡa, bena ba helaḡa noho; badina be lau na Iehova emui Dirava.

⁸Egu taravatu ba badinadia, karadia ba kara: lau binai Iehova, ihahelaḡamui Diravana.

⁹Tamana eiava sinana e uduguiraiamu tauna na bae alaia mase; tamana eiava sinana e uduguiraia dainai, rarana be sibona latanai.

¹⁰Tau ta na dekena tauna adavana ida bae heuda hanai, tau bona hahine raruosi na bae aladia mase.

¹¹Tau ta na tamana adavana ida bae heuda hanai, tamana baine hahemaraia, raruosi na bae aladia mase. Raradia na sibodia latadiai.

¹²Tau ta na rava maraḡi hahinena ida bae heuda hanai, raruosi na bae aladia mase. Idia na kara dika-hereana vada e karaia; raradiana sibodia latadiai.

¹³Tau ta na ma tau ta ida bae eno bou, una na kara mirona: raruosi na bae aladia mase; raradia na sibodia latadiai.

¹⁴Tau ta ese adavana baine eno henia bona ma sinana danu, una na kara dika-hereana:tatoiosi na lahi ai bae hamasedia, una kara dikana bogaragimui ai baine doko helaoreana.

¹⁵Tau ta na mauri ḡauna idauna ta ida bae eno bou, ia bae alaia mase bona hari mauri ḡauna danu bae alaia mase.