Pogsiognang 2:5-34

⁵Wene aro lelamekti, as Yerusalem wamekpa, nimi sisa Yahudi nimi engeropnang Allahag yubu moloropne wamekpa, nimi sisa a'ero-a'ero nimi Allahag yubu moloropnang babe wamek. Allahag yubu moloropnang taneko wameknena, “Pentakosta sum uaukap,” aro anamag, mog so'o sirikag-sirikag agha yalamekti, yubu mo-mo lerop nimi Pentakosta sumeneko as Yerusalem wamek.

⁶Yingkina wamekpa, Allah Eldamne Yame Walingeri tatsiogha sunsunum uro a'erop-a'erop yubuag lelameka yingkirop nimiri ka'ebaekti, Yahudi nimi maikno wamek nimi taneko longol alamek. Longol alamekti ka'elamsiekpa, “Yesusti otsik uro lebo” aro seneragtop nimiri yubu a'erop-a'erop yubuag lelamekpa, ka'elamsiek nimi tanekori, “Welaro lelamang? Nundam nimiri yubu ka'elamapti,” senelamek.

⁷Ka'elamsiek nimi tanekori, “Welaro lelamang,” sembaekti, yubu lelamekti, “Sin nimi taneag mane agha uro yabil. Sin Yahudinang mog so'o Galilea nimi taneko kom te?

⁸Ka'elamsiaba nununge yubuag lelamangba, welaro lelamang. Nununge as babe yubu babe a'ero lero urop nimi aghari.

⁹Nunna mog so'o Partia agha, Media agha, Elam agha, Mesopotamia agha, Yudea agha, Kapadokia agha, Pontus agha, Asia agha, Frigia agha, Pamfilia agha, Mesir agha, Kirene peramag Libia agha, Kreta agha, Arab agha, Roma agha Yerusalem yingkiropnang Yahudi nimi wamap. Roma agha Yerusalem yingkirop nimi, nhon wamapne yangkan nimi aghana Roma nimi nhon-nhon Yahudi nimi saog uro taburi, sindi omeklamangneag omeklamap nimi aghari. Tam nubunge Allahri ualne sembe lelamangba, nu mog so'o sirikag-sirikag yingkiropnangdi ka'elamsiap,” alamek.

¹²Sin wene alamek nimi tanekori, “Logti, mane agha sindi nun yubuag lelamang. Amik uro yabilulne welaro uro yabilul?” aro wene alamek.

¹³Aghana sin nenneri lelamekti, “Mag yonge teangdi nenek saelbahilba lelamang,” aro og solamsiekti, pam kwereklamsiek.

¹⁴Wene alamsiekti, pam kwereklamsiekpa, Petrus neneko elkabo ko'olombare nang eneko babe sekekpa, Petrusti yubu nubu uro ambarelamsiogti, “A'un Yahudi nimi nangkabo, Yerusalem wamlom nimi nangkabo, nari ambatsinunne nene a'un niri ka'eamsuri seneragsu.

¹⁵Wene heng ot weneog tingil alba wamap ane sembe, mag yonge teang koma agha lelamang. A'undi lelamlomne nene saog uro nimi tane mag teangba, nenek saelbahilba, lelamang kom.

¹⁶Sindi lelamangne nenena samenag Allahri ambarelamogpa, Allahri yubu silimu tiplamogne Yoel nenekori mome toro pibogha sunsunum uro lelamang,” seog.

¹⁷Wene seogti, Petrusti nen tipto lelamogti, “Allahri lebogne Yoeldi mome toro pibogne ane: 'Ik komopnag li wamikag Nari Nandamne Yame Walinge nimi mog so'oag maiknoro pelengel anun. A'undi mabo kelmaboag Nari ambatsininge sindi a'un ambatsukang. A'undi mabo Nari, “Uro yabinepne ibukang,” sembaneri, uanea sunsunum uro ibukang. Nong nimi Nari, “Lenda mabukang,” sembaneri, el nembahinenge lenda mabukang.

¹⁸Sumeneko li enekoag Na arukna kabuni babe, kelabo babe, Nandamne Yame Walinge sinag maiknoro pelengkahinun. Pelengkahineba Nari ambatsininge sunsunum uro ambarelamsukang.

¹⁹Imag 'Undo uro yabilul,' senena kekneba uaneri, so'oag agha babe, 'Im So'o Ngainge yan ual,' aro el nenehinna kekneba pimnun. Amik enengap, auk apna, auk mhong luma kuktopneap wamlul.

²⁰Im So'o Ngainge yale sum eneko elel molel arop sum talul. Aghana, ik nubu sum eneko uro yabin komag, heng inibin sog mondo seleba, wal imag wamlange eneng saog taleba,

²¹nimi etneri Im So'o Ngainge ponekoag molbale tanena Allahri nimi ane taulbalul,' aro Yoel pere agha ambarog.

²²Israel nimi nangkabo, a'unag yubu lemnunne nene ka'eamsu: Yesus Nasaretne poneko sembe, 'Yaghe, Allahri el pere agha ual' senenne kekneba nimiri uanep komne, Allah Eldamneri uanepne Yesus pere agha ulamo. Unulamoa a'undi babe ibom. Eldi ulamonge kekneba mikipne a'un haingag agha ulamo. Allahri El pere agha ulamori, Yesus Nasaretne sembe a'unag tibin nembahio.

²³Allah Eldamneri sembaogne sunsunum uro, 'Tebalea pere agha nimi mog so'oagne taulbahilul,' aro a'undi saeag Yesus tatsiogpa, Allah yubu ingisapsirop nimi saeag nembaom. Nimi saeag nembaomdi, kalag siplobomdi, obom.

²⁴Obom aghana 'El teptobag aneko ya'ag ua una sunsunum kom,' sembaogti, Allahri seklerobag nimi teptobag agha kamag nembaog.

²⁵Daud ponekori Yesusag uro yabinepne sembe lelamogti, mome toro pibogne ane, 'Im So'o Ngainge sinag kweleknag na whingag ua ulamla. Nari sae sirik sip ua ulamlaba, kemelamnari, na lagmag senep kom.

²⁶Im So'o Ngaingeri piamnelba, wana awi uro wamnari, pamag agha El omeklamna. Anenge Arukna Sol Wali Walinge neneko so'oag agha polbalul kom. Nanenge yame nimi teptobag limnululam komne, na el. Ane sembe nong aneag 'Salag lebomne kembanun,' aro tibogto wamnun.

²⁸Andi ina walinge ibatnulumba, kamag wamnundi, na An saramag wamneba, na awi yeng maikno teknebarelamnululam,' aro Daudti siplamog.”

²⁹Nen tipto Petrusti ambarelamsiogti, “Nangkabo, nunisag nubunge Daud neneko sembe nari lag phoro ambatsunun. Nunisag tebaogpa, el arameag sikekag aneko wene nuri babe ililamap.

³⁰Daud neneko Allahri yubu silimu tiptopne wamogti, ambarelamsiogne wamogpa, Allahri elag sik uro salag lelamogti, 'An anmabo mangarobari mangaroba mangkahyikne nhon an lunumna nimi salehiropne sunsunum urobag pukamlul,' aro ambarogne el wamog.

³¹Wene aro ambarogpa, Daudti amik uro yabinepne sembe el wamogti, lebogne ane, 'Na nong so'oag agha polbaneag, “Nimi teptobag babe wamle,” aro limneheng kom,' seogne nene lunumna Allahri wepleri, alikinag nembalulne neneko Allahri kamag nembanepne sembe eldi lebog.

³²Yesus neneko Allahri kamag nembaonge nuri haingdi babe ibobo.

³³Kamag nembaori, Allahri kiliro tobori, Eldi sae sirik sip alikinag nembaori, Allah Eldamne Yame Walinge salag lebogne neneko Elag pibo. Elag piboba, Eldi maiknoro pelengel alba, aoag agha ka'ebalomdi, wene haingdi babe iplom ane.

³⁴Ane sembe, Daud poneko imag yingkiog kom aghana, Daudti lebogne ane: “Na Nani Allahri na ua urop mog so'oag nimi salehiropneag yubu lelamogti,