Hinangan 2:5-34

⁵Masa miyaˈan niyaˈ laˈi si Awrusalam meˈ Yahudi amban meˈ kalahat-lahatan si dunya. Meˈ aˈa be-āgama teˈed siye.

⁶Pagkalede paghidjul diyalem lumaˈ pagtipunan meˈ tindeg si Isa miyaˈan, banes teˈed siye pī patipun. Ulaliˈ teˈed siye, peggeˈ takalede meˈ tindeg si Isahin missā kuweˈ bissāhanden dangan-dangan.

⁷Bengngangan siye duk ulaliˈ teˈed, hangkan paˈinde, “Ine inin? Meˈ aˈa amban Jalil hep meˈ mamissā inin.

⁸Weˈey teˈ siye takalete bi makabissā bissāhanten bi dangan-dangan?

⁹Kite bi matuˈu inin amban kalahat-lahatan tuˈu si dunya. Niyaˈ ne amban lahat Partiya, amban Midda, amban Elam; niyaˈ ne amban Mesopotamiya, amban Yahudiya, amban Kappadoke, amban Pontus, duk amban Asiya.

¹⁰Niyaˈ isab kite bi amban Pirigiya, amban Pampiliya, amban Misil, duk amban meˈ kalahatan laˈi si Libiya tapit si lahat Kirene; niyaˈ kite bi amban Roma.

¹¹Sinduwe kite bi inin meˈ bangsa Yahudi duk sinduwe isab dumaˈin Yahudi saguwaˈ patuhut ne si āgama Yahudi. Duk niyaˈ isab kite bi amban lahat Kerete duk amban lahat Arab. Bu kēmon kite bi takalete bi siye missā si bissāhanten bi sabab meˈ hinangan mahadje hininang Tuhanin.”

¹²Ulaliˈ teˈed siye duk gaˈi siye magkataˈu-taˈu hangkan magtilew-tinilew ne paˈin siye, paˈinde, “Ine enteˈ hātine inin?”

¹³Saguwaˈ niyaˈ sinduwe, hinangde hadja dagey meˈ tindeg si Isahin. Paˈinde, “Iyuˈ meˈ aˈa iyan maglangohan.”

¹⁴Saguwaˈ nengge si Petros magtuhut duk saweˈne sampūˈ duk dambuwaˈin duk missā iye pinapales, paˈinne, “Meˈ pagkasiku Yahudi duk kēmon kaˈam maglahat si Awrusalamin. Pakale kaˈam pahāp-hāp duk pahātihante kaˈam bang ine maˈumantag inin.

¹⁵Kannalbi meˈ aˈa inin lango, bu dumaˈin, peggeˈ lisag siyam pe hadja salung.

¹⁶Saguwaˈ takitebi kuweˈitu inin,” paˈinne, “bakas pinaˈal weˈ Nabi Joel duk kuweˈitu tuman ne. Paˈinne,

¹⁷‘Iye inin hinangku si ellew dambuli,’ paˈin Tuhanin. ‘Papiyuku Niyawakun si kēmon manusiyaˈ. Duk meˈ tubuˈbin lella-dende magpalataˈ du lapalkun. Meˈ lellabi matumbuˈin niyaˈ pabagalaku si siye duk meˈ lellabi mabahiˈin niyaˈ pataginepku si siye.

¹⁸Aweˈ,’ paˈin Tuhanin, ‘bisan si meˈ daraˈakankun lella-dende, papiyuku du Niyawakun si meˈ ellew īˈ duk magpalataˈ du siye lapalkun.

¹⁹Duk magpakite du ku meˈ makaˈulaliˈ diyataˈ langit, duk meˈ tandaˈ tuˈu si dunya: lahaˈ duk ebbut duk umbu subuk.

²⁰Mata ellewin,’ paˈinne, ‘ngalindem du, duk bulanin ngapeyat kuweˈ lahaˈ, bang sōng tekka ne ellew mahadje duk makaˈulaliˈin, ellew pangahukumku meˈ manusiyaˈin.

²¹Duk sine-sine manabbut ēnkun makiˈaseˈ si aku,’ paˈin Tuhanin, ‘timbul du iye.’”

²²Paˈin si Petros pe, “Meˈ pagkasiku aˈa Israˈil, pakalehun bi binissāku inin. Si Isa, aˈa Nasaretin, kataˈuhan weˈ asal sabennal iye pinapitu weˈ Tuhanin peggeˈ inurungan balakat iye weˈ Tuhanin, hangkan iye makahinang meˈ hinangan balakatan duk meˈ hinangan makaˈulaliˈ duk meˈ tandaˈ. Inin asal kataˈuhanbi peggeˈ tahinangne inin tuˈu diyalemanbi.

²³Tuhanin andang kataˈuhanne duk amban bayaˈne weˈ si Isa inin sinōngan pī si antananbi duk inin sakapne pu si Isahin. Duk dinaˈak weˈ bi si meˈ aˈa dusehan ilansang si Isa diyataˈ olom duk pinapatey.

²⁴Saguwaˈ pinakellum iye balik weˈ Tuhanin. Pinaluhaya iye amban katiksaˈanne kamateynen, peggeˈ asal gaˈi kapagbayaˈ si iye kamateyin.

²⁵Tasulat hep weˈ si Daˈud sabab Isa Almasi, paˈinne, ‘Luwal talessaku Panuhutankun si bihingku. Tuˈu iye si bihingku hangkan gaˈi ku suse.

²⁶Hangkan hep kēgan ateykun duk lapalanku kēgkun. Duk bisan matey barankun, niyaˈ du ase-aseku.

²⁷Peggeˈ gaˈi du ku ambanannu si lahat meˈ pateyin. Gaˈi du pasagadannu barankun mabuhukan. Aku inin daraˈakannu masutsihin.

²⁸Pinanoloˈan ku weˈ nu meˈ lān tudju umul salama-lamahin. Basta luˈu ku si antagnu, kēgan ku manamal.’

²⁹“Na, meˈ kapungtinaˈihanku,” paˈin si Petros, “akahante kaˈam papastiˈ sabab papuˈten bi, Sultan Daˈud ley. Matey du iye duk kinubul, duk kubulnen tiyaˈ pe tuˈu si kite bi sampay maˈin.

³⁰Peggeˈ nabi iye, kataˈuhanne weˈ bakas nanggup Tuhanin si iye duk napa pe weˈ si waktu sinōng niyaˈ dangan meˈ tubuˈnen magsultan du kuweˈ iyehin.

³¹Kataˈuhan andang weˈ si Daˈud bang ine matekka si sinōngin, hangkan missā iye sabab kaˈellum Almasi balik amban kamateynen. Paˈinne weˈ gaˈ du Almasi inambanan laˈi si palaˈihan meˈ pateyin, duk gaˈ du barannen buhuk.

³²Si Isa inin bakas pinakellum hep balik weˈ Tuhanin duk kami kēmon, kasaksiˈan kami weˈ inin bennal.

³³Pinahadje teˈed si Isa weˈ Tuhanin laˈi si kanawananne, lugal tamanan mabangsahanin. Duk sa pananggup Tuhanin, tapangurung ne si iye weˈ Samanen Niyawa Sutsihin. Manjari pinapitu weˈ ne Niyawa Sutsi inin si kami meˈ tindegnen. Duk meˈ takitebi duk takalebi kuweˈitu inin, hinangan Niyawa Sutsi bakas pinapitune si kamihin.

³⁴Na, dumaˈin si Daˈud mapaˈangkat si surgaˈin, saguwaˈ tabissāne inin, paˈinne pe, ‘Missā Tuhanin si Panuhutankun, paˈinne: Dayiˈ kew ningkoloˈ kew tuˈu si kanawananku, tuˈu si paningkoloˈan mabangsahanin,