Pogsiognang 15:6-20

⁶Wene seekne sembe Yesusti samenag wepto pogsiognangap, wenehiropnang tanekoap winiptaekti, “Yahudi sisa kom nimiri nengabo kon karebel talamukang to, kom to? Musari Allah yubu tipto mome tobogne ni sunsunum uro ul palamukang to, kom to?” aro tam nene sembe yubu lelamek.

⁷Yubu tam neneko sembe ko'o olog maiknoro sin mamun lero libekti, Petrus sekogti, ambarelamsiogti, “Nangkabo, Yesusag 'Sikne' aro seneragtop nimi wamap. Samenag wamububa, Allahri seneraghogti, 'Yahudi sisa kom nimiri yubu walinge Yesus sembe ka'ebaikti, Yesusag “Sikne” aro seneraglamukang,' aro Allahri a'un anabiag agha na wepneog. Wepneogpa, yubu walinge ane Yahudi sisa kom nimi tipto ambarelahisi. Samenag uro yabiogne ane sembe ni el wamlom.

⁸Allahri nimi wana kemelamsilne ponekori Eldamne Yame Walinge nu tatsiog. Nu Yahudi nimi agha Yesusag seneragtop nimi tatsiog saog uro sin Yahudi sisa kom nimi babe tarelamsiogti, 'Namabo taukang,' sembaogne kembatsiogpa, nu eltabu.

⁹Allahri 'Nimi tane Yahudi sisa nimi to, kom to?' semban koma, Yahudi sisa kom nimiri wanaag agha Yesusag “Sikne” aro seneraglameka Allahri kemelamsiog. Kemelamsiogti, sembenga sindi wanaag wamogne Allahri lupsiogpa, wanaag sik urop nimi taek.

¹⁰Allah Eldamneri undo unuaogne sembe a'un ni el wamlom aghana, sa'a sembe a'undi, 'Allahri uaogne wali to, kom to?' aro miplamlom? Tam ikinne sin Yahudi sisa kom nimi Yesus yubu ka'ero ulamang nimi taneag palilamsilom. Nunisa yabori babe nuri babe wali uro ulbinep kom bog, sa'a sembe sin sa'oag ikinne palilamsilom?

¹¹Undo unuaheng kom. Nuri wanaag seneraglamapnena, 'Yesusti Nia Mangkina Saelbamsilne ponekori nu Yahudi sisa nimi wana waliri piamsildi, nu taulbahiog saog uro, sin Yahudi sisa kom nimi babe wana waliri piamsildi, talulamsil,' aro wanaag seneraglamap,” aro ambatsiog.

¹²Wene aro ambatsiogpa, winil talamek nimi taneko yubu koma wamek. Wamekti, ka'eamekpa, Barnabasap Paulusapti, “Samenag Yahudi sisa kom nimi yog asag nimiap nhon wamoboba, Allahri nu yeplamsioba, 'Allahri sin pere agha ual,' senenne kekneba nimiri uanep komne Allah Eldamneri uanepne, undo-undo uanomo,” aro ambatsirek.

¹³Abeneko komopto ambatsirekpa, Yakobusti sin winil talamek nimi anabiag sekogti, yubu lelamogti, “Nangkabo yubu lemnunne ka'eamlulom.

¹⁴Yahudi sisa kom nimi Allah yubu ekon nimi o'ona sembamsiogti, 'Namabo taukang,' aro samenag Allahri wepsiogne sembe wene abeneko Simondi ambatsil.

¹⁵Leplange nene samenag Allahri yubu silimu tiptopnang tanekori mome toro pibekne sunsunum uro ambatsil. Samenag Allahri yubu silimu tiptop nimiri mome toro pibekne pere agha, 'Allahrina,

¹⁶“Na samoro yaneri, Daudti ae kalun ae kwerek taog ae eneko meneng ae ene agha ae soro ae walinge wendogne saog urop ae soro sekitnun.

¹⁷Sekitneba, 'Yahudi nimi pogto wamikneap, Yahudi sisa kom nimiapti Na Im So'o Ngainge wamnange elamniikti, Nari si lero seneraglamnikpa, Naringe taukang,' aro Daudti ae kalun ae kwerek taogne nen ae soro sekitnun,” aro Allahri ambatsiog,' aro mome toro pibog. Undo mome toro pibogpa, samenag agha 'Undo uro yabilul,' aro nimiri ka'ebaekti, el taek.

¹⁹Undo Allahri, 'Daudti ae kalun ae wendogne saog urop ae soro sekitnun,' aro ambatsiogne ane sembe, nari mo kareplamnange lemnuan. Yahudi sisa kom nimiri Allah yubu ka'elamekti, samenag Allahag seneraglamek kom aghana, wene Yesusag seneraglamang. Wene Yesusag seneraglamang nimi taneag tam ikinne pibukap kom sembamna.

²⁰Tam ikinne Yahudi sisa kom nimiag pibukap kom aghana, samenag agha nimi as ni wamek nimiri Musari mome toro pibogne sembe ambarelamsiekpa, ka'elamek. Wene babe Allah yubu lerop sum talamlaba, Yahudi nimiri sop-sop Allah yubu lerop aeag wa'alamangdi, Musari mome toro pibogne lelamang. Ane sembe, Yahudi sisa kom nimi Yesusag 'Sikne' aro seneragtop nimiag ambatsukapnena ane: '”Lebe aroba eneng la'imbaleag,” aro homamanga lepto oroba sopap, enengap telamlulom kom. Eneng lambaleba, sop agha telamlulom. Ora nimiri, “Phia sembe phabaukap,” aro lebe aroba sop palilamikti, mektop sop babe yoro tarelamsiikpa, telamlulom kom. Apna, nengaboap kelaboapti, “Yog nimiri kelabo nengabo sembe naringe og wamso,” aro wanaag seneragmundi, saelbahiseng kom,' aro mome toro pibeberi, yubu ambatsukap,” aro Yakobusti ambatsiog.