HECHOS 15:6-20

⁶Dzigo nacne bnabey grë zha poxtl co ni grë zha rnabey co, ycaalsa zho stib dieṉ zhapaa gaca, pe nonguieḻa tso grë zha zit bey co.

⁷Zeeṉe pcaalsa zho, goc pa lo quianee zho zeeṉe guso Pedr rëb Pedr lo zho: ―Grëse to bets, goḻquiaadiag miṉe gne naa lo to nu gaṉle. Led rsoladz to, zeeṉe griiṉpaa psilo quiagaaz Xtiidz Jesús lo miech, ible Dios bzooblo naa pxeeḻ me naa gaseed naa grë zha ne nacdraa zha Israel gliladz zho me.

⁸Ni megaa ne ruṉbey me zdoo tib tib miech, laa me blu gaṉle, niicle ne zha zit nac zho laa me pcaania zho; pxeeḻ me Espíritu Sant nacnie zho, zigne pxeeḻaque Espíritu Sant nacnie ne.

⁹Gotsaa gwi ne gaṉle, led yed Dios rbe dieṉ cho nac zha Israel cho nacgaa zha zit; zigtaa zhaw, zigtagaa new, laa me pcaania ne porne dib zdoo ne bliladz ne me.

¹⁰¿Zha nac dzigo ne racladz to gnabey to grë zha co guṉ zho grë miṉe nac xley ne? ¿Pe niacxe rieṉraa ne lo Dios dzigo? ¡Niicxe ne name, niicxe xmeṉgol ne brieelod niuṉa zigne naca!

¹¹Goḻguieṉ gaṉle, zigtaa zhaw zigtagaa new laa me csilaa ne lo doḻ grë ne, per nacda por ncuaaṉe rdziuuṉ ne; sinque laa me csilaa ne porne nquialadz me ne.

¹²Zeeṉe blozh sca bnee Pedr, dzese biac zho grë zho; dzigo laa Pabl grop Bernabé psilo bzodiidz grëtaa milagr ne blu Dios lo grë meṉzit zaatne güeynee zho Xtiidz me lo grë miech co.

¹³Blozhse bnee grop zha co, laa Jacob gusoque rëb me: ―Grëse to bets, goḻquiaadiaggaa chop lan xtidz naa nagaṉle gne naa lo to.

¹⁴Laa Pedr bzodiidzle lo ne gaṉle zha psilo bredz Dios grë zha zit, bzooblo me zho ye zho gac zha ne sëëb xnëz me.

¹⁵Ga nagoṉ goca zigne zhobneese lo Xtiidz me, miṉe pquiaa grë zha ne pxeeḻ me padzeela, rneew:

¹⁶Tedse nu gaṉle, laa naa cuedz grëse miech ne ygab lo naa; grë zha xtii David zha ne bzozit, laa zho gbig stib.

¹⁷Horco grëse zha zit, laa zho gon gaṉle cho nac naa, zeeṉa grieelo sëëb zho xnëz naa.

¹⁸Znu nac xtiidz Dios, ni padzeelale bzeet me ne laa me guṉ miṉ co.

¹⁹’Miṉ co nagoṉ grë zha zit ne rliladzle Jesús, ib nonguieḻda ga gnabey ne zho guṉ zho miṉe nac xley ne.

²⁰Sinque mazd yquia tib diidz cxeeḻ ne lo zho gon zho, grë ma ne rut miech rgogon zho lo grë zhimdio zho, ib gowd zho bëël co; grë ma ne rxieed ren zeeṉe ret ma, gowd zho ma; ni niicle grëragaa ma ne gut zho, ib gowd zho xchen ma. Grë zha bgui, nodne tsonie zho wnaa ne nacd tsieel zho; niicle wnaagaaw, nodne tsonie zho mgui ne nacd tsieel zho.