Pisalem 89:36-52

³⁶Dono madawaawa e hana hua beelaa i nia madagoaa huogodoo, gei Au ga hagaloohi dono henua i di waalooloo o di maahina o di laa.

³⁷Dono lohongo king gaa noho mau hua beelaa be di malama, dela e gila mai hua beelaa i lala di langi.”

³⁸Meenei God, Goe e hagawelewele gi dau king dela ne hilihili aga, Goe guu hudu a mee gi daha, guu dugu gi daha mo Goe.

³⁹Goe gu oho dau hagababa dela ne hai ang gi dau dangada hai hegau, gei guu hudu gi lala dono hau king gi lodo di gelegele.

⁴⁰Goe gu oho gi lala di abaaba o dono waahale, gei gu oho hogi dana gowaa hai dauwa.

⁴¹Digau huogodoo ala ma ga hula laalaa, digaula e gagaiaa nia goloo a maa, gei digau ala i dono baahi e gadagada gi mee.

⁴²Gei Goe guu dugu ang gi ono hagadaumee di mogobuna o di aali, gei guu hai digaula huogodoo gi tenetene.

⁴³Ma Kooe dela ne hai ana goloo dauwa gi deai ono hadinga ai, gaa hai a mee gi magedaa i lodo tauwa.

⁴⁴Gei Goe dela ne daa dono dogodogo king, gaa hudu di lohongo king o maa gi lodo nia gelegele.

⁴⁵Goe ne hai a mee gi madumadua i mua dono madagoaa, gaa dugu anga di haadanga balua gi mee.

⁴⁶Meenei Dimaadua, Goe ga haga ngala Goe gaa hana hua beelaa? Malaa, e waalooloo behee go do hagawelewele dela ma ga ulaula gadoo be di ahi?

⁴⁷Goe gi langahia di bodobodo o dogu mouli. Goe gi langahia bolo Goe ne hai gimaadou nia daangada hua dangada!

⁴⁸Ma koai dela e mee di mouli hagalee made? Ma koai dela e mee di bida daa ia gi daha mo dono daalunga?

⁴⁹Meenei di madau Dagi, aahee nia haga modongoohia namua i di hai o do aloho? Aahee au hagababa ala ne hai ang gi David?

⁵⁰Goe hudee de langahia digau ala ne haganneennee au, go dau dangada hai hegau, mo dogu manawa hagakono gi nia haganneennee huogodoo o digau bouli.

⁵¹Meenei Dimaadua, o hagadaumee e haganneennee dau king dela ne hilihili aga! Digaula e haganneennee a mee i nia madagoaa huogodoo ala ma gaa hana ginai mee.

⁵²Hagaamuina Dimaadua gaa hana hua beelaa! Amen! Amen!