Gesami Hea:su 89:36-52

³⁶E da eso huluane egaga fifi ahoanumu, amola Na da ea hina bagade hawa: hamosu amo ganodini eso digaga:la:be galu, ema sosodo lelumu.

³⁷Oubi da muagadodili mae fisili lela. Amo defele Da:ibidi egaga fi da Isala:ili ouligisa esalumu.”

³⁸Be amomane Di da dia ilegei hina dunuma ougi galebe, Di da e yolesiaga:le, e gogolei dagoi galebe.

³⁹Di da Dia hawa: hamosu dunuma gousa:su amo fisi dagoi amola ea habuga da udigili isu da:iya galagai dagoi.

⁴⁰Di da ea moilai fi dobea fei amo gadelale sanasi dagoi, amola ea gasa bagade gagili sali amo wadela:lesi dagoi.

⁴¹Dunu ilia da amodili baligisia, ilia da ea liligi amo wamolasa, amola e gadenene fifilai dunu ilia da e ba:le oufesega:sa.

⁴²Di da ea ha lai dunuma hasalasu hou ilima i dagoi, amola Di da ili hahawane galoma:ne hamoi.

⁴³Di da ea gegesu liligi amo gasa hamedene hahamonesi, amo e da gegesu amo ganodini ema hasalima:ne hamoi.

⁴⁴Di da ea malei galiamo fadegale fasili, amola ea hadigi fisu amo osoba gudu muwane sanasi.

⁴⁵Di da ea eso hame doaga:iya asagia, e da:i hahamonesi, amola Di da ema gogosiasu iasi.

⁴⁶Hina Gode, Dia odagi mae olele gebewane wamoaligi dialoma:bela:? Dia ougi da lalu agoane habowali seda nenanoma:bela:?

⁴⁷Na esalusu da dunumunihadi amo Di dawa:ma. Dunu nini huluane da Di hahamoi, amo Di dawa:ma!

⁴⁸Nowa da mae bogole fifi ahoanoma:bela:? Dunudafa ninia da, nini bogoi uli dogoi amoga dasa:besa:le habodane gaga:ma:bela:?

⁴⁹Hina Gode, ninia da Dia musa: asigi hou amo dawa:digisu da habila:? Dia Da:ibidima hamomusa: ilegei amo da habila:?

⁵⁰Mae gogolema, na, Dia hawa: hamosu dunu! Ilia da nama gadele sisa:nosa. Ilia da nama gagabusu aligima:ne sia: daha.

⁵¹Hina Gode, Dima ha lai ili da Dia ilegele lai Hina Bagade Ema gadele sisa:nosa! Ilia da E habodili ahoanebe ba:sea, Eba:le gadele sisa:nosa.

⁵²Hina Godema eso huluane nodone sia:noma! Ama! Ama!