Pisalem 76:4-7

⁴E madamada huoloo behee Kooe, meenei God! E madamada huoloo behee go do hanimoi labelaa gi muli i tomo nia gonduu, i di gowaa dela nogo haga magedaa ai o hagadaumee Kooe.

⁵Nia goloo digau dauwa maaloo dangihi la guu aau huogodoo gi daha, dolomeenei digaula guu kii di kii o digau mmade. Nia maaloo digaula mono hai mee gu ono hadinga ai.

⁶Meenei di God o Jacob, do madagoaa ne wou gi digaula, gei nia hoodo digaula mo digau ala e hula nia maa guu tinga gi lala gi hongo di gelegele guu mmade.

⁷Malaa, nia daangada huogodoo la gu mmaadagu i di Goe, meenei Dimaadua. Tangada e dahi e mee di duu i oo mua ai, i do madagoaa ma ga hagawelewele.