Pisalem 62:5-12

⁵Ma go God hua dela e gana ginai au, deelaa hua go Mee e hagadagadagagee ginai au.

⁶Go Mee hua dela e abaaba gei e haga dagaloaha au. Mee go dogu Dangada Daa, malaa au e deemee loo di magedaa.

⁷Dogu hagamouli mo dogu hagalaamua le e hai mai i baahi o God. Mee go dogu abaaba mau dangihi, Mee go dogu gowaa e bala iei au.

⁸Agu daangada, goodou hagadagadagagee gi God i nia madagoaa huogodoo. Hagi anga ina gi Mee godou haingadaa huogodoo, idimaa Mee go tadau gowaa e pala iei gidaadou.

⁹Nia daangada huogodoo le e hai gadoo be nia madangi ne dogi go tangada. Digau aamua mo digau mugi lala huogodoo e balumee hua be di mee e dahi. Digaula ga pauna la hagalee daamaha, digaula e koia e maamaa i nia madangi ala ma gaa dogi go tangada.

¹⁰Goodou hudee kana gi di hagawelewele. Hudee hagadagadagagee bolo goodou ga maluagina i godou gaiaa ala e hai. Ma e aha maa godou maluagina le e logowaahee mai, gei goodou hudee hagadagadagagee gi nia maa.

¹¹Au gu hagalongo haga logo gi God e helehelekai bolo nia mogobuna la nia mee ni aana,

¹²bolo dono aloho la dono hagaodi ai. Meenei Tagi, ma deelaa hua Kooe dela e hui nia daangada gii hai be nadau hegau ala nogo hai.