Pisalem 38:1-18

¹Meenei Dimaadua, Goe hudee daaligidia au i do madagoaa ma ga hagawelewele!

²Goe guu hai au gi lauwa i au amu maalei. Goe gu hagamaawa au gi hinga gi lala.

³Au guu mmae huoloo i di Goe dela e hagawelewele mai. Dogu huaidina hagatau guu magi idimaa go ogu huaidu.

⁴Au gu melemu i lodo di mmidi o ogu huaidu. Ogu huaidu gu daamaha iaa gu deemee di aamo.

⁵Idimaa au nogo dadaulia, ogu magibala gu bilau guu bala.

⁶Au gu biga iha gi mua, au guu moe baabaa gi lala. Au e manawa gee mai luada gaa dae loo gi di boo.

⁷Au guu wele i di welengina o dogu huaidina, gei au gu hoohoo gaa made.

⁸Au gu deai ogu mahi ai, gei gu maanuhia. Dogu manawa gu i lodo di haingadaa, gei au e nnguu huoloo i dogu mmae.

⁹Meenei Tagi, Goe e iloo dagu mee dela e hidihidi ginai au. Goe gu longono ogu lee mmae huogodoo.

¹⁰Dogu hadu manawa e pompomu, ogu mahi gu hagalee, ogu golomada gu dee gida.

¹¹Ogu ihoo hagaaloho mo ogu gau ala e hoohoo mai gi di au gu hagalee lloomoi gi dogu baahi, idimaa go ogu magibala. Ogu madahaanau hogi gu hagalee hagahoohoo mai gi di au.

¹²Digau ala e hiihai bolo ginaadou e daaligi au gii made la guu dugu nadau hele belee hele iei au, mo digau ala belee hagahuaidu au gi huaidu la gu haga madagudagu au bolo gii hai au gi hagalee. Digaula hagalee loo e dugu di nadau hai dela belee hai baahi mai gi di au.

¹³Au e hai gadoo be tangada longoduli dela e deemee di hagalongo, e hai gadoo be tangada e deemee di leelee dela e deemee di helekai.

¹⁴Au e hai gadoo be tangada dela hagalee helekai gi nia heeu, idimaa mee e de longono.

¹⁵Gei au e hagadagadagagee adu gi di Goe, meenei Dimaadua. Gei Goe, meenei dogu Dagi go dogu God, Goe ga helekai mai laa.

¹⁶Hudee heia ogu hagadaumee gii mmada tene gi dogu haingadaa. Hudee heia digaula gi hagapuu gi dogu hinga gi lala.

¹⁷Au gu hoohoo gaa doo, gei au e mmae huoloo.

¹⁸Au e haagi ogu huaidu ala e hagahonu au gi uli ogu gai.