Pisalem 31:1-8

¹Au e hanadu gi di Goe, meenei Dimaadua, belee hagaloohi Kooe. Goe hudee heia au gi magedaa. Goe di God e donu, au e dangi adu gi di Goe gi haga dagaloaha ina au!

²Hagalongo mai! Haga dagaloaha ina au dolomeenei! Goe gii hai dogu gowaa e bala iei au bolo gi hagaloohi au Kooe, Goe go dogu hagaloohi e haga dagaloaha au.

³Goe go dogu gowaa e hagamalu iei au, mo dogu haga dagaloaha. Aago ina au mo di dagia au e hagalaamua ai do ingoo.

⁴Benabena ina au gi daha mo di hele dela gu haganoho mai gi di au. Duulia au gi daha mo nia haingadaa.

⁵Au gu dugu adu au gi di Goe gi madamada humalia ai. Goe ga haga dagaloaha au, meenei Dimaadua, Goe la di God manawa dahi.

⁶Goe e de hiihai gi digau ala e daumaha gi nia balu god tilikai, gei au e hagadagadagagee adu gi di Goe.

⁷Au ga manawa lamalia mo di tenetene, idimaa go do manawa aloho dee modu. Goe e gidee ogu hagaduadua, Goe e iloo ogu haingadaa.

⁸Goe digi hai ogu hagadaumee gi kumudia au. Goe gu gaamai gi di au di moholo gii hana gi nia gowaa ala e hiihai ginai au.