Pisalem 27:2-11

²Maa digau huaidu ga heebagi mai gi di au belee daaligi au gii made, digaula ga tibatiba gaa tinga gi lala.

³Ma e aha maa digau dauwa dogologowaahee ga haganiga mai i dogu gili, gei au hagalee madagu. Ma e aha maa ogu hagadaumee ga heebagi mai gi di au, gei au e hagadagadagagee hua igolo gi God.

⁴Di mee hua e dahi dela e dangi iei au gi Dimaadua, di mee hua e dahi dela e hiihai ginai au: bolo au gii noho i lodo di hale o Dimaadua i di waalooloo o dogu mouli, gii mmada au gi nia madamada o Maa, ge e dangi gi Mee gi aago ina mai au dagu hai dela belee hai.

⁵I lodo nia madagoaa haingadaa, gei Mee ga abaaba au. Mee ga hagaloohi au i lodo dono Hale Daumaha, gaa dugu au gi hongo di gonduu duuduu i nua.

⁶Malaa, gei au ga aali i ogu hagadaumee ala i dogu gili. Au gaa hai dagu tigidaumaha mo di wolowolo tenetene i lodo dono Hale Daumaha. Au ga daahili, au ga hagaamu Dimaadua.

⁷Meenei Dimaadua, hagalongo mai i dogu madagoaa ma ga gahigahi Goe! Goe manawa dumaalia mai, helekai mai!

⁸Do madagoaa ne helekai boloo, “Hanimoi daumaha mai!” gei au ga helekai, “Meenei Dimaadua, au ga hanadu.”

⁹Goe hudee heia Goe gii ngala i di au! Meenei God, go dogu Hagamouli, Goe hudee hagawelewele mai, Goe hudee diagia dau dangada hai hegau deenei. Goe go dogu Hagamaamaa, Goe hudee huli gi daha mo au, Goe hudee diagi ina au.

¹⁰Dogu damana mo dogu dinana holongo e mee di diiagi au, gei Dimaadua e benebene au.

¹¹Meenei Dimaadua, aago ina au gi au mee ala e hiihai bolo au gi heia. Dagia au i hongo di ala huudonu, idimaa, ogu hagadaumee le e dogologo.