Pisalem 119:58-162

⁵⁸Au e madau adu gi di Goe mai i lodo dogu manawa hagatau bolo Goe gi dumaalia mai gi di au, gii hai be dau hagababa dela ne hai.

⁵⁹Au gu daamada gu hagabaubau dagu hai dela e mouli iei au, gei au gu hagababa bolo au ga daudali au helekai aago.

⁶⁰Au hagalee hagaduai, au ga hagalimalima ga daudali au helekai.

⁶¹Digau huaidu guu dugu di nadau hele belee hele au, gei au hagalee de langahia au haganoho.

⁶²I di madahidi waelua di boo, gei au e ala aga e hagaamu Goe, idimaa Goe dela e gabunga au mee gii donu.

⁶³Au di hoo ni digau huogodoo ala e hai hegau adu gi di Goe, go digau huogodoo ala e hagalongo ge e daudali au haganoho.

⁶⁴Meenei Dimaadua, henuailala e honu i do aloho dee modu, aago ina au gi au haganoho.

⁶⁵Meenei Dimaadua, Goe gu hagagila aga dau hagababa, gei Goe e humalia mai gi di au, go dau dangada hai hegau.

⁶⁶Gaamai gi di au di iloo nia mee mo di kabemee, idimaa au e hagadonu au helekai.

⁶⁷I mua dau hagaduadua au, gei au nogo hai agu mee hala, gei dolomeenei gei au gu daudali au helekai.

⁶⁸Goe e humalia, gei e hai au mee humalia! Aago ina au gi au helekai.

⁶⁹Digau hagamuamua guu hai nadau helekai tilikai i di au, gei au e daudali hua au helekai mai i lodo dogu manawa hagatau.

⁷⁰Digaula nadau iloo ai, gei au haganoho la aalaa nia mee e haga manawa lamalia au.

⁷¹Ogu dadaaligi le e humalia mai gi di au, idimaa nia maa e hai au gii kabe au helekai.

⁷²Au haganoho ala ne gaamai gi di au la koia e hagalabagau ko au laa hongo nia bahihadu huogodoo o henuailala.

⁷³Goe dela ne hai au, gei Goe dela e benebene au haga humalia. Gaamai gi di au di kabemee, gi iloo eau au haganoho.

⁷⁴Digau ala e hagalaamua Goe la ga manawa lamalia ma ga mmada mai gi di au, idimaa au dela e hagadonu au hagababa.

⁷⁵Meenei Dimaadua, au e iloo bolo Goe e hagi aga au mee gi di ala dela e donu, gei Goe dela ne daaligi au idimaa goe dela e manawa dahi.

⁷⁶Heia do aloho waalooloo gi haga manawa lamalia ina au, gii hai be dau hagababa dela ne hai mai gi di au, go dau dangada hai hegau.

⁷⁷Goe gi manawa dumaalia mai gi di au, gei au ga mouli, idimaa au haganoho la aalaa nia mee e haga manawa lamalia au.

⁷⁸Heia digau ala e hagamuamua la gi langaadia, idimaa digaula e hai baahi mai gi di au, gei au, au ga mamaanadu hua au helekai aago.

⁷⁹Heia digau ala e hagalaamua Goe la gi lloomoi gi di au, aalaa go digau huogodoo ala e iloo ginaadou au helekai.

⁸⁰Heia au gii dohu di daudali au haganoho gi de langaadia au i dogu magedaa.

⁸¹Meenei Dimaadua, au gu dogono huoloo dagu talitali Goe belee hagamouli au, gei au e hagadonu huoloo au helekai.

⁸²Ogu golomada guu pili di haga daumada au mee ala ne hagababa, gei au ga heeu, “Goe e hagamaamaa au ma gaa hee?”

⁸³Au gu balumee gadoo be di peege gili manu bobo ne hudu gi daha, malaa gei au hagalee de langahia eau au helekai.

⁸⁴Au belee hai loo gii tali waalooloo behee? Ma gaa hee gei Goe ga daaligi digau ala e haihai au haga huaidu?

⁸⁵Digau hagamuamua ala hagalee hagagila aga au haganoho la guu geli nadau luwa belee hele au.

⁸⁶Au haganoho huogodoo le e donu. Hagamaamaa ina au, idimaa nia daangada e hagahuaidu au gi nadau helekai tilikai.

⁸⁷Digaula gu hoohoo hua bolo ga daaligi au gii made, gei au hagalee huli gi daha mo au haganoho.

⁸⁸Idimaa go do aloho dee modu, Goe hila mai gi di au, gii mee au di daudali au haganoho.

⁸⁹Meenei Dimaadua, au helekai la ga waalooloo hua beelaa, dono hagaodi ai. Nia maa e tuu mau i di langi.

⁹⁰Do manawa dahi le e waalooloo hua beelaa ang gi nia madawaawaa huogodoo. Goe ne dugu henuailala gi dono lohongo, gei di maa gu noho hua beelaa.

⁹¹Nia mee huogodoo e noho hua beelaa gi dangi nei idimaa go au helekai, idimaa nia mee huogodoo le e hai hegau adu gi di Goe.

⁹²Maa nei bolo au haganoho la hagalee go nia mee ala e hagatenetene au, malaa, au tangada hua guu made i lodo ogu hagammaemmae.

⁹³Au ga hagalee de langahia eau au aago, idimaa Goe e dadaahi hua dogu mouli mai i nia maa.

⁹⁴Haga dagaloaha ina au, idimaa au di mee ni aau! Au gu hagamahi bolo e daudali au haganoho.

⁹⁵Digau huaidu e talitali au belee daaligi gii made, gei au gaa haa au haganoho gi ogu lodo.

⁹⁶Au gu iloo eau bolo nia mee huogodoo la ono hagaodi gi muli i golo, gei au haganoho la ono hagaodi ai.

⁹⁷E koia e damanaiee go dogu aloho i au haganoho! Au e mamaanadu nia maa mai luada gaa dae loo gi di boo.

⁹⁸Au haganoho le e madalia au i nia madagoaa huogodoo, e hai au gi kabemee gi hongo ogu hagadaumee.

⁹⁹Au gu kabemee i hongo ogu gau agoago huogodoo, idimaa, au dela e hagamamaanadu au helekai aago.

¹⁰⁰Au e iloo nia mee i hongo digau ala mmaadua, idimaa, au dela e haga gila aga au haganoho.

¹⁰¹Au gu haga mogowaa au gi daha mo nia hagadilinga hangaahai huaidu huogodoo, idimaa au dela e hiihai e hagalongo ang gi au helekai.

¹⁰²Au hagalee huli gi daha mo au haganoho, idimaa, ma Kooe hua dela e aago mai nia maa gi di au.

¹⁰³E koia e maangala go au helekai! Au helekai koia e maangala i hongo nia mee maangala ala e hai go nia lamu llauehe.

¹⁰⁴Au gu kabemee mai i di gili au haganoho, deelaa di mee e hidi iei au e hagadugina huoloo gi nia hagadilinga hangaahai huaidu huogodoo.

¹⁰⁵Au helekai la go di malama dela e dagi au, gei go di maalama dela e ina dogu ala.

¹⁰⁶Au ga hagagila aga dagu hagababa dela bolo au ga hagalongo gi au haganoho e donu.

¹⁰⁷Meenei Dimaadua, ogu hagammaemmae la gu logowaahee! Goe dadaahia hua beelaa dogu mouli, gii hai be dau hagababa dela ne hai.

¹⁰⁸Meenei Dimaadua, Goe hila mai gi dagu dalodalo danggee, aago ina mai au gi au haganoho.

¹⁰⁹Au gu dee hagahuodia eau dogu mouli, gei au digi de langahia eau au haganoho.

¹¹⁰Digau huaidu guu hai nadau hele belee hele au, gei au digi de hagalongo gi au haganoho.

¹¹¹Au haganoho la go dogu haga maluagina ga hana hua dee odi, ma go nia maa ala e haga tene dogu manawa.

¹¹²Au gu hagamaanadu i lodo dogu manawa bolo au ga hagalongo gi au haganoho gaa dae loo gi dogu laangi dela e made iei au.

¹¹³Au e hagadugina i digau ala hagalee manawa dahi adu gi di Goe, gei au e aloho i au haganoho.

¹¹⁴Goe go dogu duuli mo dogu hagaloohi, au e hagadagadagagee gi au hagababa.

¹¹⁵Goodou go digau huaidu, goodou hula gi daha mo au. Au ga daudali nia haganoho a dogu God.

¹¹⁶Hagamaaloo ina aga au, gii hai be dau hagababa dela ne hai, gei au ga mouli. Goe hudee heia au gi langaadia i lodo dogu hagadagadagagee!

¹¹⁷Daahia au, gei au ga mouli humalia, gei au ga daudali au haganoho i nia madagoaa huogodoo.

¹¹⁸Goe e hagabalumee digau huogodoo ala hagalee e daudali au haganoho. Nia hagamamaanadu tilikai digaula la ono hadinga ai.

¹¹⁹Goe guu dugu digau huaidu huogodoo bolo digau hua balumee, gei au e haga dahidamee au helekai.

¹²⁰Au gu madagu i di Goe, au gu madagu huoloo i dau gabunga.

¹²¹Au guu hai nia mee ala e donu ge humalia. Goe hudee diagia au gi lodo nia mogobuna o ogu hagadaumee!

¹²²Heia dau hagababa mai gi di au bolo Goe ga hagamaamaa dau dangada hai hegau. Goe hudee dugu ina au gi digau hagamuamua gi daaligidia.

¹²³Ogu golomada guu pili di haga daumada Goe dela belee hanimoi e haga dagaloaha au, di haga dagaloaha dela ne hagababa Kooe.

¹²⁴Heia mai gi di au gii hai be do aloho dee modu, mo di aago ina mai gi di au au haganoho.

¹²⁵Au go dau dangada hai hegau, gaamai gi di au di kabemee, gi iloo eau au agoago.

¹²⁶Deenei la do madagoaa, meenei Dimaadua, belee daaligi digaula, idimaa nia daangada la gu de hagalongo gi au haganoho.

¹²⁷Au e haga dahidamee au haganoho laa hongo nia goolo, nia goolo ala e kaedahi e humalia.

¹²⁸Deelaa dagu mee e daudali au aago huogodoo, gei e hagadugina eau nia ala huogodoo ala e hala.

¹²⁹Au agoago le e humalia huoloo. Au e haga kila aga nia maa mai i lodo dogu manawa hagatau.

¹³⁰Di haga modongoohia o au agoago le e hidi mai ai di maalama, ge e hai digau ala de kabemee gi kabemee.

¹³¹Au e hanga dogu ngudu gi daha mo di dogidogi hagapodo i dogu hiihai huoloo gi au helekai.

¹³²Huli mai gi di au mo di manawa dumaalia mai gi di au, be dau hai dela e hai Kooe gi digau huogodoo ala e aaloho i di Goe.

¹³³Goe gumidia au gi dee doo, gii hai be dau hagababa dela ne hai. Hudee heia au gii kumi go di huaidu.

¹³⁴Haga dagaloaha ina au gi daha mo digau ala e hagahuaidu au, gii mee au di hagagila aga au haganoho.

¹³⁵O hadumada la gi haga maalama ina au, go dau dangada hai hegau, aago ina au gi au haganoho.

¹³⁶Au e dangi huoloo ogu lodo, idimaa nia daangada la hagalee hagalongo gi au haganoho.

¹³⁷Meenei Dimaadua, Goe e donu, gei au haganoho le e donu.

¹³⁸Nia haganoho ala ne gaamai Kooe le e donu huoloo ge e humalia.

¹³⁹Dogu hagawelewele guu gaa i ogu lodo gadoo be di ahi, idimaa go ogu hagadaumee ala e haga balumee au haganoho.

¹⁴⁰Au hagababa ala ne hai mai gi di au le e donu huoloo! Au e aloho huoloo i nia maa!

¹⁴¹Dogu huaidina la hagalee dahidamee, di balumee hua, gei au hagalee de langahia eau au haganoho.

¹⁴²Oo donu le e donu gaa hana hua beelaa, gei au haganoho le e donu i nia madagoaa huogodoo.

¹⁴³Au guu honu i nia haingadaa mo dee baba, gei au haganoho e hai au gi tenetene.

¹⁴⁴Au aago mai gi di au le e donu i nia madagoaa huogodoo. Gaamai gi di au di kabemee, gei au gaa mee di mouli.

¹⁴⁵Au e gahigahi Goe mai i lodo dogu manawa hagatau, meenei Dimaadua. Helekai mai, gei au ga hagalongo gi au helekai!

¹⁴⁶Au e gahigahi Goe, haga dagaloaha ina au, gei au ga hagagila aga au haganoho.

¹⁴⁷I mua di laa ma gaa hobo, gei au e gahigahi Goe i di hagamaamaa. Au e hagadagadagagee huoloo gi au hagababa.

¹⁴⁸I di waalooloo di boo, gei au e moe hagaala hia e hagamamaanadu au aago.

¹⁴⁹Meenei Dimaadua, hagalongo mai gi di au, idimaa do aloho le e waalooloo, hagamodongoohia ina mai gi di au do dumaalia, haga mouli ina au!

¹⁵⁰Ogu hagadaumee huaidu la gu lloomoi gu hoohoo mai, go digau ala hagalee loo e hagagila aga au haganoho.

¹⁵¹Gei goe e hoohoo mai gi dogu baahi, meenei Dimaadua, gei au helekai huogodoo le e noho hua beelaa.

¹⁵²Mai loo i mua gei au gu iloo eau au aago. Goe ne hai nia maa bolo gi noho hua waalooloo beelaa.

¹⁵³Mmada mai gi dogu hagammaemmae, haga dagaloaha ina au, idimaa au digi huli gi daha mo au haganoho.

¹⁵⁴Hagamaamaa ina au i ogu donu, mo di haga dagaloaha ina au. Benabena ina dogu mouli gii hai be dau hagababa dela ne hai.

¹⁵⁵Digau huaidu la hagalee mouli, i digaula ala hagalee daudali au haganoho.

¹⁵⁶Gei do aloho le e aamua huoloo, meenei Dimaadua, hagamodongoohia ina mai do dumaalia mo di hagamouli ina au!

¹⁵⁷Ogu hagadaumee mo digau ala e dadaaligi au le e dogologowaahee, gei au hagalee huli gi daha mo au haganoho.

¹⁵⁸Dogu madagoaa ma gaa mmada gi digau hagi aga dangada aalaa, gei au e hagawelewele huoloo, idimaa digaula hagalee hagagila aga au haganoho.

¹⁵⁹Meenei Dimaadua, mmada mai gi di au dela e aloho i au aago. Do aloho la hagalee huli, malaa goe haga dagaloaha ina au!

¹⁶⁰Di hagamau o au haganoho la go di tonu, gei au gabunga huogodoo le e donu ge dono hagaodi ai.

¹⁶¹Digau aamua e hai baahi mai gi di au dono hadinga ai, gei au e hagalaamua au haganoho.

¹⁶²Au e tenetene huoloo gi au hagababa, e tenetene gadoo be tangada ma gaa gida ana goloo hagalabagau.