Pisalem 119:32-42

³²Au ga haga limalima ga daudali au helekai, idimaa Goe dela ga haga damana aga dogu kabemee.

³³Meenei Dimaadua, aago ina mai gi di au tadinga o au haganoho, gei au ga daudali nia maa i nia madagoaa huogodoo.

³⁴Hagamodongoohia ina mai gi di au au haganoho, gei au ga hagagila aga nia maa mai i lodo dogu manawa hagatau.

³⁵Dagia hua au i hongo nia ala o au haganoho, idimaa aalaa nia mee e haga manawa lamalia au.

³⁶Gaamai gi di au di hiihai dela e hagagila aga au haganoho, laa hongo dogu hiihai gi nia maluagina.

³⁷Heia au gi de hiihai gi nia balu mee. Heia mai di humalia be dau hagababa dela ne hai.

³⁸Heia mai gi di au au mee ala gu hagababa bolo e hai mai gi di au, go dau dangada hai hegau, go di hagababa dela ne hai Kooe gi digau huogodoo ala e hagalongo adu gi di Goe.

³⁹Haga dagaloaha ina au gi daha mo nia haganneennee ala e madagu iei au. Dau hagi aga le e hagagoboina huoloo!

⁴⁰Au e hiihai e daudali au helekai. Gaamai gi di au di mouli hoou, idimaa Goe dela e donu.

⁴¹Meenei Dimaadua, hagamodongoohia ina mai gi di au dau hai dela e aloho i di au, mo di haga dagaloaha au gii hai be dau hagababa dela ne hai.

⁴²Gei au gaa mee di helekai gi digau ala e haganneennee au, idimaa au e hagadagadagagee gi au helekai.