Pesalem 89:17-46

¹⁷Gebe aôm kôtu êsêac waeŋ to ŋaclai ŋamôkê. Aômnêm moasiŋ kêwaka aêacma ŋaê sa e ŋapep.

¹⁸Gebe Apômtau kêtu aêacnêŋ lautuc ŋatau ma Israelnêŋ ŋac dabuŋ kêtu aêacnêŋ kiŋ nê ŋatau.

¹⁹Gêdêŋ gêmuŋgeŋ aôm gôwa nêm biŋ sa gêdêŋ nêm sakiŋwaga ŋaŋêŋ ŋa ŋakatu gebe “Aê kakêŋ sunsuŋ kiŋŋa gêdêŋ ŋactêkwa teŋ kêkuc ênam lau sa. Aa kakêŋ lêpôŋ kiŋŋa gêdêŋ ŋac, taŋ kajaliŋ sa aŋga lau nêŋ naŋ.

²⁰Aê katap ŋoc sakiŋwaga Dawid sa, gaeŋ oso eŋ ŋa ŋoc niptêkwi dabuŋ

²¹gebe lemoc êpuc eŋ tôŋ endeŋ tôŋgeŋ ma lemoc êkêŋ ŋaclai êndêŋ eŋ.

²²Nê ŋacjo ênsau êôc eŋ êtôm atom ma secwaga teŋ êku eŋ tulu atom.

²³Aê gabe janseŋ ênê ŋacjo popoc sênêc eŋ laŋônêmŋa ma janac êsêac, taŋ sêkêŋ kisa eŋ naŋ êndu.

²⁴Aêŋoc biŋ ŋaŋêŋ to têtac gêwiŋ teŋgeŋŋa êpuc eŋ tôŋ. Aêŋoc ŋaê oc êsuŋ ênê wae sa.

²⁵Aê jakêŋ ênê gôliŋ ŋamadiŋ aŋga gwêc ŋaluŋ e êndêŋ bu kapôêŋ Euprat.

²⁶Eŋ oc awa ênac aê gebe ‘Aêŋoc tamoc aôm, aôm kôtu ŋoc Anôtô to ŋoc moasiŋ ŋamôkê.’

²⁷Aê gabe jakêŋ eŋ êtu latuc ŋamêc. Eŋ kêtu kiŋ nomŋa nêŋ ŋatau.

²⁸Aê oc jamoasiŋ eŋ endeŋ tôŋgeŋ ma matoc êsap ŋoc poac tôŋ ŋajaŋa êtu eŋŋa.

²⁹Aê gabe jawaka ênê gôlôac nêŋ teŋ sa endeŋ tôŋgeŋ gebe êtu kiŋ ma ênê lêpôŋ êkô ŋapaŋ êtôm undambê.

³⁰“Ênê latui embe sêwi ŋoc biŋ siŋ ma nêŋ lêŋ eso aêŋoc biŋ, taŋ kajatu naŋ,

³¹ma embe sêŋgôm aêŋoc biŋ êtu meloc ma sêkêŋ taŋeŋ ŋoc biŋsu atom,

³²oc jai êsêac ŋa palip êtu sêkac tauŋ suŋa ma oc janac êsêac êtu nêŋ kwalecŋa.

³³Mago gabe jaŋgamiŋ ŋoc moasiŋ êndêŋ Dawid atom ma jansa ŋoc biŋ ŋaŋêŋ auc êndêŋ eŋ atomanô.

³⁴Aê gabe jaŋgôm ŋoc poac êtu biŋ lêlêŋa atom ma janam biŋ, taŋ aocsuŋ kasôm lasê naŋ, ôkwi atom.

³⁵“Aê ŋac dabuŋ, tec katôc lemoc sa kêpi tauc katu dim tageŋ gebe jansau Dawid teŋ atomanô.

³⁶Ênê gôlôac oc sêmoa endeŋ tôŋgeŋ. Ênê lêpôŋ êtôm oc, taŋ kêkô aê laŋôcnêm naŋ.

³⁷Eŋ oc êmoa endeŋ tôŋgeŋ êtôm ajôŋ, taŋ kêtôm gêwa-biŋ-tau-sawaga ŋaŋêŋ aŋga tao lôlôcŋa naŋ.”

³⁸Mago galoc aôm kôtiŋ to kômasuc ma têmtac ŋandaŋ gêdêŋ nêm ŋac, taŋ goeŋ oso eŋ naŋ.

³⁹Aôm kôsap poac, taŋ kômoatiŋ gêdêŋ nêm sakiŋwaga naŋ tulu ma gôgôm ênê sunsuŋ kêtu meloc ma kôpalip kêsêp lêsap gêja.

⁴⁰Aôm goseŋ ênê tuŋbôm samob êliŋ-êliŋ ma kôsiŋ baliŋ ênê malac totuŋbôm e popoc jamuŋ-jamuŋgeŋ.

⁴¹Lau samob, taŋ sêsa tonaŋ sêja-sêmêŋ naŋ, sêjaŋgo gêŋ aŋga ênê nê lau mêŋbaŋ eŋ sêsu eŋ susu.

⁴²Aôm kôkêŋ lau, taŋ sêlêsu eŋ naŋ, sêku eŋ tulu. Aôm kôkêŋ ênê ŋacjo samob e sêpi-sêpigeŋ kêtu eŋŋa.

⁴³Aôm kôkêŋ eŋ gêc tonê siŋ ŋamatageŋ gêja ma gêdêŋ siŋ kêsa naŋ, kôpuc eŋ tôŋ atom.

⁴⁴Aôm gôgôm e ênê ŋawasi gêjaŋa samob ma kôtiŋ ênê lêpôŋ piŋpaŋ jagêc nom.

⁴⁵Aôm kôgasuŋ ênê bêc ŋapalê matacŋa kêtu dambê ma kôkêŋ maja to ŋawapac kêsalê eŋ auc.

⁴⁶O Apômtau, gobe ônam taôm auc samucgeŋ e êndêŋ ondocgeŋ acgom. Aômnêm têmtac ŋandaŋ ŋajawaô êndaŋgac e êndêŋ ondocgeŋ acgom.