Pesalem 77:1-18

¹Aê gamôêc gêdêŋ Anôtô ŋa aoc kapôêŋ. Biŋŋanô aê gabe jamôêc. Gamôêc kapôêŋ gêdêŋ Anôtô gebe eŋ êkêŋ taŋa aê.

²Gêdêŋ taŋ gêŋwapac gêgôm aê naŋ, aê kateŋ mec gêdêŋ Apômtau, mago gêŋ teŋ gêjam malô aê atom.

³Aê embe taêc ênam Anôtô, oc janiŋ oliŋ tauc. Embe taêc ênam biŋ ŋam, oc ŋoc kauc ensom mala ôkwi.

⁴Eŋ kêkêŋ aê gajam jali gêbêcauc samuc. ŋoc ŋalêlôm ŋatutuc e kasôm biŋ jageo.

⁵Aê taêc gêjam kêsêp bêc gêmuŋgeŋŋa ma jala, taŋ gêjaŋa wanêcgeŋ su naŋ, amboac tonaŋ.

⁶Kêtôm gêbêcgeŋ aê taêc gêjam biŋ jakêsa-jakêsa. Aê taêc gêjam biŋ gêc ŋoc ŋalêlôm ma kakip sa e ganac matoc gebe

⁷“Apômtau oc êtiŋ aêac su samucgeŋ ma êmoasiŋ aêac êtiam atomanô me masi.

⁸Ênê têtac gêwiŋ teŋgeŋŋa gêbacnê me. Ma biŋ, taŋ eŋ gêjac mata naŋ, gêjac pep su me.

⁹Anôtô oc kêliŋ êmoasiŋ lauŋa siŋ me. Ênê têtac ŋandaŋ gêbôc nê taê walô auc me.”

¹⁰Tec kasôm gêdêŋ tauc gebe “Aêŋoc ŋalêlôm ŋawapac ŋanô gebe Apômtau gêjam nê gôliŋ ôkwi.”

¹¹Aê gabe taêc ênam gêŋ, taŋ Apômtau gêgôm naŋ. Biŋŋanô, gabe taêc ênam nêm gêŋtalô, taŋ gôgôm gêdêŋ andaŋgeŋ naŋ.

¹²Jakip gêŋ samob, taŋ aôm gôgôm naŋ, ŋam sa ma jasala aômnêm gêŋsêga samob.

¹³O Anôtô, nêm intêna dabuŋ. Lau samuc nêŋ anôtô ondoc kapôêŋ kêtôm aôm.

¹⁴Aôm taômgeŋ Anôtô, taŋ gôgôm gêŋsêga naŋ. Aôm kôwaka nêm ŋaclai sa gêdêŋ tenteŋlatu sêlic.

¹⁵Lêmam ŋajaŋa gôjam nêm lau, Jakob agêc Josep latuŋi kêsi.

¹⁶O Anôtô, gêdêŋ taŋ bu gêlic aôm naŋ, kêtêc aôm. Ma gwêc ŋagêdim kêtênêp lasê.

¹⁷Tao sêsêwa kom ŋasec to umboŋ ŋatêtac kêkêŋ wapap gêjac. Ma aômnêm sôbôsic geŋ gamêŋ gêŋgic-gêŋgic.

¹⁸Aômnêm wapap ŋakicsêa ŋadindiŋ kaiŋ teŋ, ôsic kêpô gamêŋ ŋawê kêsa e nom ŋawiwic dendeŋgeŋ to kôtêŋ-kôtêŋgeŋ.