Pesalem 72:5-19

⁵Gôlôac to gôlôac têtêc aôm êtôm têm, taŋ oc ajôŋ êpô gamêŋ naŋ.

⁶Kiŋ êtôm kom, taŋ gêjac kêsêp kôm ma eŋ oc êtôm kom, taŋ kêmalôm nom naŋ.

⁷Êtôm kiŋ tau nê têm biŋgêdêŋ ênac tau lêtêŋ amboac ŋaola ŋajam ma wama ênam gamêŋ auc kêtôm ajuŋ ŋawê kêpô gamêŋ gêôc aucgeŋ.

⁸Ênê gamêŋ gôliŋŋa ênêc gwêc ŋamadiŋ teŋ e naêndêŋ ŋamadiŋ teŋ ma aŋga bu Euprat e naêndêŋ nom ŋamadiŋ.

⁹lau gamêŋ sawaŋa sêpôŋ aeŋduc êndêŋ eŋ ma nê ŋacjo sêu tauŋ sênêc nom.

¹⁰Kiŋ Tarsis to lau, taŋ sêŋgôŋ nuc naŋ, oc sejoŋ nêŋ awa nasênsuŋ êndêŋ eŋ. Lau Arabia to Aitiopia ŋataui oc sêkêŋ nêŋ awamata êndêŋ eŋ.

¹¹Biŋŋanô, kiŋ samob oc tetoc eŋ sa. Lau samuc samob oc sênam sakiŋ êndêŋ eŋ.

¹²Gebe eŋ oc ênam ŋac ŋalêlôm sawa, taŋ awa gêjac eŋ naŋ sa ma ŋac ŋasec, taŋ gêjam-sawaga gêmoa atom naŋ, amboac tonaŋgeŋ.

¹³Eŋ oc taê labu ŋac ŋaôma to ŋalêlôm sawa ma ejop lau sawa nêŋ katuŋ.

¹⁴Eŋ oc ênam êsêacnêŋ katuŋ kêsi aŋga lêsutêna to ŋaclai-secwaga lemeŋ. Eŋ oc êlic lau tonaŋ ŋai nêŋ dec amboac gêŋ ŋanô.

¹⁵Kiŋ oc êŋgôŋ ŋêŋgeŋ ma sêkêŋ gold Arabiaŋa êndêŋ eŋ. Êsêac teteŋ mec êtu eŋŋa endeŋ tôŋgeŋ ma Anôtônê mec êpi eŋ ŋapaŋ.

¹⁶Mo êmôp lasê ênêc ênê gaboaŋ ma êtu secŋa ênêc lôctêpôê. Mu êôc ênê gêŋkaiŋ ŋatêpôê naêsêp-naêsêp amboac aŋga Lebanon ma ŋamalac êlêc aŋga malac êtôm gêgwaŋ gêlêc aŋga nom.

¹⁷Ênê ŋaê oc ênêc endeŋ tôŋgeŋ. Ênê wae ênêc êtôm oc êpô gamêŋ. Lau nomŋa samob aweŋ êôc eŋ ma teteŋ Anôtô gebe ênam mec eŋ to êkêŋ eŋ êmoa totêtac ŋajamgeŋ.

¹⁸Lambiŋ êndêŋ Apômtau, lau Israelnêŋ Anôtô. Eŋ taugeŋ tec gêgôm gêŋsêga gêmoa.

¹⁹Lambiŋ êndêŋ ênê ŋaê towae endeŋ tôŋgeŋ. Ênê ŋawasi ênam nom auc samucgeŋ. Biŋŋanô, biŋŋanôgoc.