Pesalem 72:2-16

²Gebe ênam gôliŋ nêm lau ŋa biŋgêdêŋgeŋ ma êmêtôc lau ŋasec nêŋ biŋ katôgeŋ.

³Lôc sênam ŋanô moasiŋ êmoasiŋ lauŋa ma gamêŋ ŋabau sênam ŋanô biŋgêdêŋ.

⁴Kiŋ êmêtôc lau ŋalêlôm sawa nêŋ biŋ naêndêŋgeŋ, eŋ ênam lau sêpô lênaŋa sa ma êka êsêacnêŋ lêsutêna popoc.

⁵Gôlôac to gôlôac têtêc aôm êtôm têm, taŋ oc ajôŋ êpô gamêŋ naŋ.

⁶Kiŋ êtôm kom, taŋ gêjac kêsêp kôm ma eŋ oc êtôm kom, taŋ kêmalôm nom naŋ.

⁷Êtôm kiŋ tau nê têm biŋgêdêŋ ênac tau lêtêŋ amboac ŋaola ŋajam ma wama ênam gamêŋ auc kêtôm ajuŋ ŋawê kêpô gamêŋ gêôc aucgeŋ.

⁸Ênê gamêŋ gôliŋŋa ênêc gwêc ŋamadiŋ teŋ e naêndêŋ ŋamadiŋ teŋ ma aŋga bu Euprat e naêndêŋ nom ŋamadiŋ.

⁹lau gamêŋ sawaŋa sêpôŋ aeŋduc êndêŋ eŋ ma nê ŋacjo sêu tauŋ sênêc nom.

¹⁰Kiŋ Tarsis to lau, taŋ sêŋgôŋ nuc naŋ, oc sejoŋ nêŋ awa nasênsuŋ êndêŋ eŋ. Lau Arabia to Aitiopia ŋataui oc sêkêŋ nêŋ awamata êndêŋ eŋ.

¹¹Biŋŋanô, kiŋ samob oc tetoc eŋ sa. Lau samuc samob oc sênam sakiŋ êndêŋ eŋ.

¹²Gebe eŋ oc ênam ŋac ŋalêlôm sawa, taŋ awa gêjac eŋ naŋ sa ma ŋac ŋasec, taŋ gêjam-sawaga gêmoa atom naŋ, amboac tonaŋgeŋ.

¹³Eŋ oc taê labu ŋac ŋaôma to ŋalêlôm sawa ma ejop lau sawa nêŋ katuŋ.

¹⁴Eŋ oc ênam êsêacnêŋ katuŋ kêsi aŋga lêsutêna to ŋaclai-secwaga lemeŋ. Eŋ oc êlic lau tonaŋ ŋai nêŋ dec amboac gêŋ ŋanô.

¹⁵Kiŋ oc êŋgôŋ ŋêŋgeŋ ma sêkêŋ gold Arabiaŋa êndêŋ eŋ. Êsêac teteŋ mec êtu eŋŋa endeŋ tôŋgeŋ ma Anôtônê mec êpi eŋ ŋapaŋ.

¹⁶Mo êmôp lasê ênêc ênê gaboaŋ ma êtu secŋa ênêc lôctêpôê. Mu êôc ênê gêŋkaiŋ ŋatêpôê naêsêp-naêsêp amboac aŋga Lebanon ma ŋamalac êlêc aŋga malac êtôm gêgwaŋ gêlêc aŋga nom.