Pesalem 31:2-15

²Ôê taŋam aê ma mêŋônam aê sa sebeŋ. Ôtu ŋoc poclabu ôŋgandê aê ma ŋoc tuŋtêna gebe ôpiŋ aê auc.

³Aôm tec kôtu ŋoc poclabu to tuŋtênagoc. Aôm oc ôkam to ôwê aê êtu nêm ŋaêŋa.

⁴Aôm oc wê aê sa aŋga uc, taŋ êsêac sêkic kelecgeŋ kêtu aêŋa naŋ, gebe aôm kôtu aêŋoc lamu.

⁵Aê jasakiŋ ŋoc katuc êndêŋ aôm lêmam êwac. O Apomtau, aôm Anôtô ŋaŋêŋ, tec gôjam aê sa.

⁶Aôm têmtac gedec êsêac, taŋ sêsap gwam ŋaôma tôŋ naŋ samucgeŋ, mago aê matoc kêsap Apômtau tôŋ.

⁷Aê oc têtac ŋajam ma ôlic êpigeŋ êtu nêm têmtac gêwiŋ teŋgeŋŋa gebe aôm matam gê aê gêdêŋ gaŋgôŋ jageoŋa ma kôjala ŋoc katuc ôluŋ-ôluŋ ŋam.

⁸Aôm gôwi aê siŋ kêsêp ŋacjonê lêma atom. Aôm kôkêŋ aê ockaiŋ kaka gamêŋ ŋatapa tôŋ.

⁹O Apômtau, taêm walô aê gebe gaŋgôŋ jageo. Gêŋwapac gêgôm aê matocanô ŋatalô kêsa e katuc to ôlic kêlênim tau.

¹⁰Ŋoc têm gamoa matoc jaliŋa samob kêtu gêŋwapacŋageŋ gêja ma kataŋ taŋiboa kêtôm ŋoc jala samob. Aê tekoc gêbac kêtu gamoa jageoŋa ma ŋoc ŋatêkwa kêtu goloŋ su.

¹¹Ŋoc ŋacjo samob têtaŋ pêlê aê ma ŋoc lau, taŋ sackapoagêdô gêdêŋ tauŋ naŋ, sêsu sam su aê. Ŋoc sêlêb embe sêlic aê, oc têtêc aê. Lau teŋ embe têtap aê sa aŋga intêna, oc sêc aê.

¹²Êsêac sêliŋ aê siŋ amboac ŋac, taŋ gêmac êndu su naŋ. Aê katôm ku ŋamoasagac.

¹³Lau taêsam sêjac biŋ kesec-kesec gêdêŋ tauŋ. Gêŋ secsêga kêkôm aê auc. Êsêac sêmasaŋ biŋ sêwiŋ tauŋ gebe senseŋ aê su janaŋa.

¹⁴O Apômtau, mago aê tec kasap aôm tôŋgeŋ. Aê kasôm gebe “Ŋoc Anôtô aôm.”

¹⁵Aôm lêmam gôjam gôliŋ ŋoc lêŋ. Amboac tonaŋ ônam aê sa aŋga ŋoc ŋacjo to lau, taŋ sêlêsu aê naŋ.