Pesalem 18:4-15

⁴Gêmacanô ŋadembom gênôm aê auc to gêŋ gebe enseŋ aêŋa kêtakê aê.

⁵Lamboam ŋa-uc kêkic aê auc. Gêmac ŋalakô mêŋkêtap aê sa.

⁶Gamoa e katuc uŋ tageŋ ma aoc gêjac Apômtau. Gamôêc gêdêŋ ŋoc Anôtô gebe ênam aê sa. Eŋ gêŋgôŋ nê gamêŋ dabuŋ ŋalêlôm e gêŋô ŋoc môêc. Ma gê taŋa aêŋoc taŋiboa, taŋ kataŋ gaŋgôŋ eŋ laŋônêmŋa naŋ.

⁷Go ôjô gêjam to nom ŋawiwic kêsa to kôtêŋ-kôtêŋgeŋ ma lôc ŋam kêtênêp e kôjô-kôjôgeŋ, gebe eŋ totêtac ŋandaŋ gêmoa.

⁸Jadauŋ kêsa eŋ lusuawa to ja ŋawaô kêsa eŋ awasuŋ ma ŋamôsi kêpêlaŋ aŋga ênê kêsa gêja-gêja.

⁹Eŋ kêwê undambê sêlilip kêsêp gêmêŋ. Ma tao majaŋ gêc eŋ akaiŋ ŋalabu.

¹⁰Eŋ mêŋgêlôb gêŋgôŋ kerub ŋaô to mu ŋamagê kêpuc eŋ tôŋ mêŋkelelo gêmoa.

¹¹Eŋ kêkwa tau auc ŋa gêsuŋbôm. Kom ŋamajaŋ to tao tokatap-tokatap kêkôm ênê bec auc.

¹²Tao kêkôm ênê ŋawasi auc, mago kompoc to jawaô mêŋkêlêpaŋ kêsa.

¹³Go Apômtau kêkêŋ nê wapap kêtaŋ aŋga undambê. Ma Lôlôc Ŋatau kêkêŋ nê awa kompoc to jawaô kêsa.

¹⁴Eŋ kêpê nê ŋacjo ŋa sôb e sêc sêjam gamêŋ aucgeŋ sêja. Eŋ kêpalip ôsic e kêjanda êsêac êliŋ-êliŋ.

¹⁵Gêgôm e gwêc ŋagêdimbob gêôc tau sa kêtu awê ma nom ŋataoŋ kêwaka tau sa. Gebe aôm Apômtau gôjam wambaŋ e atêm bu gwec-gwecgeŋ.