Pesalem 147:2-11

²Apômtau kêkwê Jerusalem sa kêtiam. Eŋ gêjac Israel latuŋi, taŋ sêmoa saliŋ-saliŋ naŋ sa.

³Eŋ kêmoasiŋ êsêac, taŋ ŋalêlôm popoc naŋ, ma kêsabaŋ êsêacnêŋ kamoc ŋandaŋ.

⁴Eŋ kêkêŋ utitalata kêtôm tau taê gêjam ma kêsam êsêacnêŋ ŋaê samob tomalageŋ.

⁵Aêacnêŋ Apômtau eŋ ŋac kapôêŋ to ŋaclaisêga. Ênê mêtê ŋadôŋ gêc atomanô.

⁶Apômtau gêjam lau ŋasec sa ma kêtiŋ alôb-alôbwaga piŋpaŋ jasêc nom.

⁷Apuc Apômtaunê wê daŋgeŋa sa. Aŋgôm gêŋ wêŋa êtaŋ êndêŋ aêacnêŋ Anôtô.

⁸Eŋ kêkêŋ tao gêsac umboŋ ma kêkêŋ kom kêmalôm nom to kêkêŋ gêgwaŋ kêpuc aŋga lôc.

⁹Eŋ gêlôm bôc ma kêkêŋ mo gêdêŋ aoco ŋalatu, taŋ têtaŋ gêdêŋ eŋ naŋ.

¹⁰Eŋ têtac gêwiŋ hos ŋaclai atom to gêlic ŋamalac, taŋ labum ŋajaŋa naŋ ŋajam atom.

¹¹Apômtau têtac gêwiŋ lau, taŋ têtêc eŋ naŋ, to têtac gêwiŋ lau, taŋ sêkêŋ mateŋ ênê têtac gêwiŋ teŋgeŋŋa naŋ.