Pakeke 15:11-17

¹¹Avele, lemir ako ve God i el werer it nge a Toko Pomnga a Jisas ile themosaling. Ranga ve ako i el werer or a i nge.”

¹²Na Pita ile riong i vus ma toko na seng alavusnga ako ru o pathun, o men poreng ol inga na ako ru o nongpol a Pol ome a Barnabas ole riong ako or paini o ritet nge pathepolong na pakukukaling pulua ako God i oma i a or paini omeni a tokokoe areko or ini Judare avele otheki.

¹³Mako o ri ma i vus. Mako Jems i ria ve, “Titeikre, o nongal lek riong.

¹⁴Ma Saimon i ritet ma vus nge ako God i eso a tokokoe areko or ini Judare avele, na i ateal toko na seng pelie ako ru a or nge ve aro ini ile.

¹⁵Na God ile riong elnga nomengangare ole riong i vene mun inga aken. Ma o wat vene:

¹⁶“Mako Toko Pomnga i ri ve, ‘Panen aro tho lo werer me. Na Devit ile vel ako i matu aro tho pamit werera mun i, na vel a ur elonga i kerenga aro tho oma werer mun i na tho pamit werera i.

¹⁷Vene na toko alavusnga ake ru a ulue aro o or a Toko Pomnga. Ako ini toko na seng areko or ini Judare avele ako tho ateal or lale mo aro ini lek. Na ini a Toko Pomnga ako i oma ur areke, na i ri vene re aken.’