Oweziwa wa Yinsa 2:7-45

⁷Aari oshankawene etthiipo milomo khuuma khusala olupa yoori: “Atthu apa nttakhulaaye apha ooshi khahi akalileya apa?

⁸Khi ensulukhwana toovi fweeyo niwaasiilaka khwa luuka zetthu?

⁹Fweeyo nalankha Parithiya, akina alankha Mediiya, akina Elaami, akina Mesopotamiya, akina Yudeya, akina Kapatosiya, akina Pontu na Aasiya,

¹⁰akina alankha Firijiya, akina Pamfiiliya, akina Misuri na pantthe za Liibiya kharipu na Sireeni, na anamathotola alankhiyeeyo Rooma.

¹¹Waaza mayaahuti mpakha apale eettiyeeyo ntiini ya maya huuti, akereeti na aarapu. Ila nawaasiila khwa luuka zetthu yo alupaka vitthu zootikinisa na khuluzeene za Nnyizinku.

¹²Ooshi aari oshankisiwa khuhisala ajuwa hatha etthu yoolupa, khusala oozelana araka: “Maana a vitthu zaya epi niini?”

¹³Atthu akina khusala awaatheya maaswihaapa apale owoozaka yoori eetta ohapaliwa.

¹⁴Aphano Pheeturu na ashirikhaawe apale khumi na mmote khulankha khusala owooza atthu yoori: “Maswahipu zaka mayaahuti mpakha mooshi mweeyo mwiniikhalaaye nti wa Yerusaleemu, mwisiileze etthu kintakhaaye olupa:

¹⁵mweeyo mwinoona nkhama atthu apa eettiye ohapaliwa, ila wala khahapaliweeni nkhama mwinaakanyerazo mpakha apha saawuuni ya supu.

¹⁶Vitthu zaya epi zirettikhaniyeeyozo zaalupiwe rakuzeene ti napiya Yowele araka:

¹⁷‘Nnyizinku alupa yoori: “Siikhu za mwiisho kinteela oweeshushela atthu ooshi Rooho Ttakatthiifu. Aana enu aalume na apa aakha anteela alupa vitthu zinteelaaye orettikhana khwa nzina laka, mashaapu anteela oothoonyeziwa vitthu zootikinisa. Ana khuuluvale anteela wiiyana jozi.

¹⁸Khwa akarumeya aka aalume na aakha, yo kiniweekha Rooho yaka siikhu zaya etthiipo yo anteela olaleya hapari zaka.

¹⁹Kinteela othoonyeza vitthu zootikinisa, kinteelaazo ottha otulu pinkuuni kinteela opuwisa vitthu zootikinisa vathi voolumwenku, zinteela orettikhana minjuza, enteela wiiyavo taamu na moottho mawiku na loosi.

²⁰Njuwa lithatuwe liiye looripa, mweezi na-ye othatuwe wiiye taamu, epoza enteela orettikhana khapula ehinafiye siikhu khuulu ya siifwa za Nnyizinku.

²¹Ila atthu ooshi apale anttelaaye onkhuwela Nnyizinku yoori awaawuuni antta wuusurukha!”’

²²Mweeyo mwa atthu a Ezirayeele mwisiileze mattakhuzi apa: Yinsa wa Nazareeti tu wookhupaliwa ti Nnyizinku. Ye Nnyizinku oretta minjuza za waatta vakatthi venu mweeyo na alama kiina zaya khwa ye.

²³Othuuto Nnyizinku awinkhiyeenini mweeyo arina shawurina, ila mweeyo khkusanyeya na atthu ootakhala rooho khunkhomela vansalapa khumuula.

²⁴Nnyizinku othuuto ansisimula muufwa na khunsinttisa owahi woofwa maana yaari etthu yooronyiwa ye oshintti ti oofwa.

²⁵Daawuuda anlopeziye yoori: ‘Wakhula wakathi kaari omoona Mbwana ari omaasho waka maana ye ori nkhona-nlume aka, yoori kihiveveluwe.

²⁶T'iito rooho yaka yoofurahi na nlimi laka lininttitthimisa; miili aka onteela onvumula orina nroromelo,

²⁷maana khunteela olikha nafusi yaka nkhapuri khunteela okanswi, khukhupaleli na khunteela okhupalela yoori Nttakatthiifu awo oone vitthu zootakhala nkhapuri.

²⁸Wakinozela tarikhi ya ohaayi, onteela okiitaaza furaha amana kiiya vamote na-weyo.’

²⁹Pheeturu khuri: “Attwizaka, mwikiwejele kiwuuzeni saana saana monkoni wa papeetthu Daawuuda yoori ye afwa khuzikhiwa khapuri yawe eri mmuti mwetthu nttmphu mpakha leelo eti.

³⁰Ye aari napiyu na aari ojuwa yoori Nnyizinky ahitiye yoori vakatthi wa peewu yawe aari onteela opuwavo mfwalume ari oteelaaye osalana puuro yawe ya ofwalume.

³¹Daawuuda aari ojuwa etthu Nnyizinkku aari weettelaaye oretta t'iito aari aalupiyeeyo monkoni wa osisimuwa wa Al-Masiihu othuuto Nnyizinku ahanlikhiyeeyo nkhapuri, wala mwiili awe ophomowa.

³²Nnyizinku ansisimula Yinsa, fweeyo naamashaahiti a vitthu zaya epo.

³³Khuweziwa olawa wiikhala nkhono-nlume wa Nnyizinku, ye enkhiwa Rooho Ttakatthiifu ti Papaawe nkhama etthiipile aamwahitiyeeyo apha eetta oniitthelela t'iithiiti mwinoonaaye na mwinsiilaaye enasaapi eti.

³⁴Daawuuda khaweziweeni pinkuuni, ila atukhunu alupaka yoori: ‘Mbwana amuuza Mbwanaaka yoori: “Wiikhale pantteya nkhono weelume aka,

³⁵mpakha miiyo kiwaattha maatuwi awo awaaluwatthele.”’

³⁶Aphano, atthu ooshi a Ezirayeele ana yoojuwa yoori: Yinsa, othuuto mweeyo mwankhameliyeeyo, Nnyizinku omwinkha wiiya Mbwana na wiiya Al-Masiihu.

³⁷Paata yoosiila mattakhuzi apale, khuwaapattha kupari nroho mwaya, khumuuzela Pheeturu na maaswihaapa apale akinaaya yoori nkahayani: “Attwiizetthu, apho niri je?”

³⁸Pheeturu khawaajipu araka: “Mwithupwiye na wakhula mmote wa mweeyo oosiwe khwa nzina la Yinsa Al-Masiihu yoori mwipatthe nswammaha wa twampi zenu. Mwintta opokhera tthuvo ya Rooho Ttakatthiifu.

³⁹Ahiti yaya eto ti yenu, mweeyo mpakha aaneenu na atthu akina awoolepawo: khwa apale ooshi Mbwaneetthu Nnyizinku awaakhuweliyeeyo.”

⁴⁰Khwa mattakhuzi menkeene Pheeturu khusala awaalipisela atthu na awaatumenela araka;” Mwijuusuru vakatthi ya khapila ya atthu apa otakhala rooho.”

⁴¹Atthu awaatta khukhupalela tafusiiri ya Pheeturu, khujilakelela olawa woosiwa. Siikhu yaya etile atthu eekezeleyiye khwiiya alufu ttatthu.

⁴²Yo aari ooshututela masomi apale oosomisiwa ti maaswihaapa aari oosiilana, na okusanyeya oja vamote na olompa vamote.

⁴³Ooshi aarina woova nwulweene, maana Nnyizinku eetta ovira aretttaka vitthu zootikinisa na minjuza zawaatta khwa khaazi ya maaswihaapa apale.

⁴⁴Atthu ooshi apale ankhupaliyeeyo Yinsa aarina osiilana wookhomaala saaneene, wakhula etile yaari opattikhanaaye eetta omeelana.

⁴⁵Akina aari wuuzanyisa mashapa aya na vitthu zaya: onzurukhu aya n'ootiisa oteela owaamela azaaya, wakhula ntthu aari winkhiwa khwa khiiwa ya othowiwa wawe.