Hechos 2:7-45

⁷Ntseeb psee meñ, xñee meñ lo xcombañer: —¿Pe lëdy nonsyke meñ Galilea nayak nak kchë meñ nii nchenee?

⁸¿Xa mod nak busy, nii xtsyon no xñee kchë meñ gue xtiitsë no?

⁹Nche meñ Partia nu, ni meñ Media, ni meñ Elam, ni meñ Mesopotamia, ni meñ Judea, ni meñ Capodocia, ni meñ Ponto, ni meñ nii sëëd nëz Asia,

¹⁰ni meñ Frigia, ni meñ Panfilia, ni meñ Egipto, ni meñ Libia nii ncheno kexka Cirene, ni meñ Roma. No pxosy meñ go nak xaa Israel, no gaa meñ go kwsëëb xlad meñ Israel xmod.

¹¹Ni nche meñ Creta ni Arabia nu. Per kchësy no xtsyon xñee meñ re xkyalntson Dios con mer xtiitsë no.

¹²Kchësy meñ go psee aan nandy meñ go pe cos kwxaak. Ngo nii lika lo xcombañer meñ go xñee meñ go: —Nli gaa na ¿xa nak kchë cos re?

¹³Lëë stubla gaa meñ lika kwtsityni, xñee: —¿Pe ksal do xaa gue?, xsyudzy xaa.

¹⁴Tsigo lëë ksa tsiipchop apostle kusoli aan lëë Pedre chëb: —Meñ Judea ni kchësy to siñee ncheno do Jerusalén, kol kaknan nrii, ni kol kon nii kñen lo do.

¹⁵Xsyusty meñ re gon sinak nladzy to, por bii sily, lëë las nueve kal nak.

¹⁶Lëë nii kwnee profet Joel noyak cumplir. Lëë xaa chëb:

¹⁷Tsi lëë tse go tsitsib, xñee Dios, lëën kxal xKyalbini Ntsonaa lo kchë meñ nii nche lo kislyu. Lëë xiñgan do ni xiñtsyaap to kñee xtitsaa, lëën kñe lo xaa yeeñ lo mgaal, ni lëë xaa kol kñee xkaal.

¹⁸Lëën kxal xKyaalbiniin lo mguiy ni lo kwnaa nii xsoob xtitsaa, tsiin kñee meñ go xtitsaa.

¹⁹Lëën kuuñtsyey kyalntson leñ kpaa, lëë lo kislyu lëë styoo meñ ksee kan meñ cheñ ni ki ni koxtoo.

²⁰Lëë lo ngbidz jkyey, lëë mëë kyak cheñ, antes nii lëë Dios nii xñabey lëë no kiid. Ntseeb kak tse go.

²¹Per stelaa kchë meñ nii kuptsyë kwetsy Dios parñee kakni Dios meñ go.

²²Tsigo lëë Pedre chëb: —Kchësy to siñee nak to meñ Israel, kol jkëëtyag nii kñen. Nan do gon nii lëë Dios kwle Jesús Nazaret lady to, ni nan do nii por lëë xaa beeñtsyey Dios ndaly kyalntson.

²³Per tsi lëë xaa pkaa ña do, lëë xaa beety to, pkëë do xaa lo crusy. Kchë do meñ ngoptol, beeñtsyey do sinak nii nol kik Dios kak.

²⁴Per lëë Dios beeñ kpañ xaa, pteelaa Dios xaa lo xyoob kyalkuty, kwlëbty kyalkuty lo xaa.

²⁵Sinrii xñee rey David tsi lëë xaa xseety Jesús: Tugak xñech Dios nii xñabey lon, tugak nakni xaa naa, ngo nii pe kaktyaa.

²⁶Por ngo xle styoon, ni nguiool cholaa. Mbëë kpañaa, pe tsinidy kikaa,

²⁷por nanaa nii klaadyoo kyaanaa laañee xyaan meñ kuty, ni nanaa nii klaadyoo kyodz xcuerpaa.

²⁸Lii bluuy nëz nii xnee kyalmbañ lon, ni slen tsiñee lëën kan lii.

²⁹Loxsye ngo lëë Pedre chëb: —Beetsy, kol kwës gaanoo, lëën kniy lo do nii lëë pxusykoltoo no David kuty, ni lëë xaa pkyeetsy, lëë xpaa gaa xaa bii xtyon no.

³⁰Tu xaa nii xyeñ xtiits Dios kok David. Ngo nii nan xaa nii lo xtiiy xaa kwe Dios tu xaa nii kñabey.

³¹Sotak David nii lëëw tse chan xaa tsiñee kwnee xaa nii lëë Crist kpañ, ni tsi lëë xaa kwnee nii kyaandy xcuerp Crist laañee xyaan meñ kuty ni kyosty xcuerp xaa.

³²Ni nan gaa to nii lëë Dios beeñ kpañ Jesús, ni kchëë noo xñee nii ptyon noo.

³³Lëë Jesús pañ parñee sob xaa kwi Dios nëzli, kñabey xaa. Ni lëë Dios kaa ptee xKyalbini Ntson lo xaa, aan lëë xaa pxaal Kyalbini Ntson go lo kislyu. Lëë ngo nak nii chan do ni biñ do natse.

³⁴Lëdy David byëp kpaa, por misme David chëb: Chëb Dios lo xaa nii xñabey naa: “Kwsob kwin nëzli kñabeyoo,

³⁵mentre lëën kuñ nii ksoob meñ nii xlëë lool xtiitsoo.”

³⁶’Kol kaknano kchësy to siñee nak to meñ Israel nii misme Jesús nii pkëë do lo crusy nak xaa nii kwle Dios, ni lëë Dios pso xaa xñabey xaa.

³⁷Tsiñee lëë meñ nii nche siko biñ xtiits Pedre, mban pteestyoo kchë meñ go, aan lëë meñ go kwnabtiits lo Pedre ni lo apostle chëb: —Beetsy, kol në pe cos kuuñ noo.

³⁸Tsigo lëë Pedre kwëb chëb: —Kol ktsëë xmod to, kol ktikche styoo do lo Dios, ni kol chobnis kchësy to siñee xniladzy to xtiits Dios parñee kak perdón xtol do, tsiin singo mod lëë Dios kneetsy Kyalbini Ntson lo do.

³⁹Lo do ni lo xiñ do ni lo meñ sit pxaal Dios tiits re. Lëë tiits re sëëd lo kchë meñ nii klyañ styoo Dios kwetsy xaa.

⁴⁰Lëdy nriisy kwnee Pedre, ndalyre nii kwnee xaa lo meñ, chëb xaa: —Kol ksaan kchë tol nii chuuñtsyey meñ nii xnilasty xtiits Dios.

⁴¹Tsigo lëë meñ nii psal xtiits xaa kwchobnis, aan tse go kwsëëb siik tson mily meñ nii kal bniladzy lady meñ nii xniladzyle.

⁴²Aan iip psaandy meñ go kchë nii bluuy apostle, mbëë pañ meñ go kchë xcombañer, chutiitsni meñ go Dios ni xkaal lsa meñ go par kaw meñ go kyaxtily tusyke.

⁴³Kchë meñ psee kon kchë kyalntson nii blaa Dios beeñtsyey apostle.

⁴⁴Kchësy meñ nii bniladzy tugak kok meñ go ni pkady meñ go kchë nii chap meñ go lo xcombañer.

⁴⁵Pto meñ go kchë nii chap meñ go, aan kchë tumi go pkaasy según lyaadzy nii ncheno tub tub meñ.