Olcueih 31:1-16

¹Manghai Lemuel kah olka olrhuh. He nen ni amah khaw a manu loh a toel.

²Ka ca me tlam lae? Ka bungko lamkah ka capa me tlam lae? Ka olcaeng dong lamkah ka capa me tlam lae?

³Na thadueng te huta pum dongah pae tarha boeh, na longpuei te manghai rhoek aka khoe ham ni te.

⁴Manghai Lemuel ham bueng moenih. Manghai rhoek loh misurtui a ok ham moenih. Boeica rhoek long khaw yu a tuep ham moenih.

⁵A ok tih a taem te a hnilh atah, phacip phabaem ca boeih kah dumlai te talh ve.

⁶Yu te aka milh taengah, misur te a hinglu aka khahing taengah pae uh.

⁷O saeh lamtah a khodaeng te hnilh saeh. A thakthaenah khaw koep poek boel saeh.

⁸Olmueh ham khaw, cadah cadum ca boeih kah dumlai ham khaw na ka te ong pah.

⁹Na ka te ong lamtah duengnah neh laitloek pah. Mangdaeng neh khodaeng te khaw tang sak lah.

¹⁰Tatthai nu he unim aka hmu? Lungvang lakah a phu khaw kuel.

¹¹A boei kah lungbuei khaw anih dongah pangtung tih, kutbuem khaw vaitah pawh.

¹²A boei te hnothen neh a thuung tih, a hing tue khuiah boethae om pawh.

¹³Tumul neh hlamik a tlap tih a kut naep la a saii.

¹⁴thimpom sangpho bangla om tih, amah caak khaw khohla bangsang lamkah hang khuen.

¹⁵Khoyin ah thoo tih a imkhui ham maeh, a tanu rhoek ham hma a taeng pah.

¹⁶Khohmuen te a mangtaeng tih, amah kutci neh a lai. Misur khaw a tue rhoe la a tue coeng.