Olcueih 12:8-28

⁸A lungmingnah olka dongah hlang loh a thangthen tih, lungbuei aka paihaeh tah nueihbu la poeh.

⁹Rhaidaeng mai cakhaw a taengah sal aka khueh tah, thangpom uh tih caak aka nai lakah then.

¹⁰Aka dueng long tah a rhamsa kah a hinglu te a ming dae, halang kah haidamnah tah muenying muenyang la om.

¹¹Amah khohmuen aka tawn loh buh a cung sak tih, a lungbuei aka talh long tah a hoenghoep te a hloem.

¹²Boethae rhoek kah tluum te halang loh a nai dae, aka dueng rhoek kah a yung tah cuen yoeyah.

¹³Hmuilai kah boekoek dongah boethae kah hlaeh om dae, aka dueng tah citcai lamloh loeih.

¹⁴Hlang kah lai thaih loh hnothen a cung sak tih, hlang kut neh a tiing la amah taengah a mael rhoe, a mael pah.

¹⁵Aka ang kah longpuei tah a mikhmuh ah thuem dae, aka cueih kah cilsuep te ni a hnatun.

¹⁶Aka ang loh khothaih ah a konoinah te a phoe dae, aka thaai long yah koi te a dah.

¹⁷Uepomnah aka sat loh duengnah a thui tih, a honghi kah laipai tah hlangthai palat ni.

¹⁸cunghang kah tingtoehnah bangla aka cal buengrhuet khaw om dae, aka cueih kah a lai tah hoeihnah la om.

¹⁹Oltak kah hmuilai tah a yoeyah la cikngae tih, a honghi ol cat ka paa sak.

²⁰Hlangthai palat loh a lungbuei khuikah boethae te a uep tih, rhoepnah ham aka uen loh kohoenah a dang.

²¹Aka dueng te boethae pakhat long khaw a cuhu thil moenih. Tedae halang rhoek tah boethae neh baetawt uh.

²²A honghi kah hmuilai tah BOEIPA a tueilaehkoi tih uepomnah aka saii te a kolonah la a khueh.

²³Aka thaai hlang long tah mingnah te a tuem tih, aka ang kah lungbuei long tah a anglat te a yan.

²⁴Aka haam kah kut loh a taemrhai vetih payal te saldong la a om sak ni.

²⁵Lungbuei kah mawnnah loh hlang a bungkawn tih, ol then loh ko a hoe sak.

²⁶Aka dueng long tah a hui te tlap tih, halang rhoek kah longpuei tah amamih te kho a hmang puei.

²⁷Palyal loh a sakah pataeng a kaeh moenih, tedae hlang haam kah a boeirhaeng tah a phu tlo.

²⁸Duengnah caehlong ah hingnah om tih, a hawn longpuei khaw dueknah moenih.