Numbers 21:20-22

²⁰Bamoth is a valey in the cuntrey of Moab, in the cop of Phasga, that biholdith ayens the deseert.

²¹Forsothe Israel sente messangeris to Seon, kyng of Ammorreis, and seide,

²²Y biseche that it be leueful to me to passe thorou thi loond; we schulen not bowe in to the feeldis and vyneris; we schulen not drynke watris of pittis; we schulen go in the kyngis weie, til we passen thi termes.