Niqiqoosa 19:12-25

¹²Faiqí ánaasee aurímarusa níkaqaafasaa Pauroona ankísa fee qamunna fée ani mara máree aurímarusa nímufanoo aurírafa taikée marínau, fáafasaaqa náakirafa rafúdamaki sandéemarinau.

¹³Yuda máqannaasa akaqáusa misá faqa fáafasaaqa náakimarusa niqiqéemarusa máriqau. Miqí qímasee áanoomasee Pauroona faqa Sirasina faqa qumáreeqa rarisámammaree kiapana oopísaki quqáqau. Mi-oopisáfa sía káqinni márinau, makéeta qámbaanai márufaqa misá Pauroosa Sirasisa rarisámasee mi-oopisánaki quqásee aiqáma kiapausa náaramasee únna qímasee qiqau. Moodáa fasiqa faiqinámu qísauku dínni taikásee dínni ani qaraqánda marasée fáafasaaqa niqiqée marusa máriqau.

¹⁴Misá níkoona áuqu Sikeefaafa márinau Yuda máqannaasa Ánutuna aanáiqikirausa úriqararafa márinau. Mi-fasiqána faiqi námu Pauroona óosana qáfeeqa maasá faqa miná óosana amanamásee qáfaanauree qímaseeqa, faiqí moó fáafasaaqa áakimaruna óonuree áuqamáseeqa qiqau. Anée Yísuna áuqu Pauroofa qímannimimarina irisée anée ráudamaki sée fífua qufanoo fáafasaaqa fannoo maaqí qímasee narí mi-fasiqána aunduráindari misá qímanniminau. Ee, máa̱, qinée Yísunara íridaqa Pauroonara faqa íridaqa ínnee yáu yáusee máridee qinée sía ínniara íridaqa.

¹⁶Miqí qímaseenoo faiqí narí áqoondiki máru fasiqana dadaaqufanoo fíndifinoo firaaqóo uqanna misá nárí nárí iseenoo misá qamunna anaqí mároofaqa káqisamu máaqakiqari rafúdamaki quqásee sandáqau.

¹⁷Eefeesusa máqusa márusa faqa Yuda máqannaa animárusa faqa mi-ufána irisoofanoo káaqa náaquqoofaqa Karaambáiqa Yísuna áuqu firaaqóo uqéeraqau.

¹⁸Yísuna ufa írimarusa míquna iriséeqa Pauroofunnai suqúmaree aniréeqa náriqa mandáinaina óosana óosana kooroo iqáu.

¹⁹Yísuna ufa írimarusakiqari áukainaina mandáinaina afunee áinaina máraqa nusáuqa náriqa mandá ufa ákaraki quqáqoona moodáanaki suqúseeqa aiqámausa nífusaa firaaqóo idáraqau. Idáqoo papiqana feefaurímaruna moodáanaki ásaana rúmasoofanoo maaqímminau. Firaa munnimma tia (K50,000) áqimaruna idá raqau.

²⁰Dóo miqímasoofanoo Karaambáiqa ufa aiqáma atinai dáraanimambufanoo dóo afeekaikámáfinoo atukaramáfinau.

²¹Mi-ainainná taikásoofanoo miná maaríqoo Pauroofa qinau. Qinée maaqóoqari Maseedoonia máqa maaqai faqa Kirisa máqa maaqai faqa óonuree aniréemaseeqa Yeerusareenni kafáa óoru fúanaura. Miqóo óoru máridaqa Roomma máqusa óonu qáfaanaura.

²²Miqí qímaseenoo Pauroofa Timootina faqa Eerasatusana faqa niqiqoofaqa Maseedoonia máqa maaqai indaarú fiqau. Pauroofa Asia máqa maaqai káqi máriufanoo nínaaqiana finau.

²³Eefeesusa máqusai káqi márufanoo moo mándáinaina Karaambáiqa ufamáu fímarusaki kambíqanau. Mi-aukuanná misá Yísuna ufara Karaambáiqa aaná fee qímariqau.

²⁴Asia máqannaasa nári moo únna ánutunara ánaasee ánutufa márinau foo qímariqau. Mi-anaaseená áuqu Arateemisa námmarifa márinau. Mi-anaasee anutúna amana Eefeesusa máqusa firaa amaana maqakí márinau. Óoninnai áuqira amaana máqa firaatiá ámiqirafa uqanna márinau. Eefeesusa máqusai faiqí moo áuqu Deemeetiriusafa máridanoo mi-amaana maqána qáfaidanoo miná amana kái siruáauqa maraséenoo idáki tasírisirimáseenoo moómoo káqikaanáuqa áuqíiseenoo faiqí ánaasee nímufaqa feefaurúmmasaidaqa máraidaqa nári máaqaki múnu quqásaidaqa innaaru qímariqau. Deemeetiriusafa siruáa áuqimarusa úriqararafa márufaqa misá aiqáma mi-saikánannai munnimma máree maríqau.

²⁵Deemeetiriusafa siruáa áuqimarusa náarama moodáanaki quqáseenoo qímanniminoo qinau. Óo maa-fasiqáusa maasá saikásaaqari munnimma kambíqaidanoo.