Niqiqoosa 18:19-28

¹⁹Sípa fannoo ooruku námmari taqamáreenoo Siria máqa maaqai fídanoo Eefeesusa máqusai náaree óonuranau. Óonureenoo Pauroofa Yuda máqannaa ufa suqíra máqaki kéeqafufanoo Yísunara naamúaqimasoofaqa misá qiqau anée kísaaqasaa máridana maasá qímaqimia qufanoo Pauroofa maaqí qímasee narí qímanniminau. Ánutufa qiníara kafáa ániannee qínnanara kafáa óonurandee ánianaura. Miqí qímaseenoo Pirisira námmarina faqa Akuirana faqa miqóo Eefeesusa máqusai quqánniséenoo sípaki akarámafufanoo Isaraee máqa maaqai Seesareea máqusai finau.

²²Sípa fannoo Pauroona áfiqee Seesareea máqusai múnaisóofanoo afíuqákufanoo maqámau Yeerusareenni óoru fínau. Óorureenoo narí Yísuna ufa írimariasa narí ákaqaafasaakirausa níndafeenoo káqikaaqoo misá faqa márinoo óorurandee Antiooka máqusai indaarú máriunnai kafáa finau.

²³Antiooka máqusai káqikaaqoo márinoo kafáa fíndifinoo Karatia máqa maaqaki faqa Firikia máqa maaqaki faqa óonuree aniréenoo Yísuna ufa írimarusa poodúqara ufa qímanniminoo nufaqa Yísuna ufara afeekaíkiqau.

²⁴Yuda máqannaa fasiqa moo áuqu Apooroosafa Areekasandiria máqusai kambíqoofa mi-fasiqáfa Eefeesusa máqusai ani márinau. Mifá ámiqimandee káaqa ufa qímarufa. Mooseena sándufara faqa tamummáqara ufa ákara faqa káaqa mi-ufáusa ámiqimandee írimarufa márinau.

²⁵Yísuna ufa írimarusa mi-fasiqána Yísuna ufa ámiqimasee qímamisoofanoo írimarufa márinau. Mifá maqee maqee andeeqásee Yísunara faiqí ánaasee qímannimidanoo káaqa fuki faakí qímarufa márinau. Mifá óoqai Yoohaneefa nammári nímimaru nammarína mároofa Yísuna nammáriara sía írinau.

²⁶Apooroosáfa mifá Eefeesusa máqusai aniréenoo Yuda máqannaa ufa suqíra maqaki paasóosamandaida qímannimimarufanoo Akuirafa faqa Pirisira námmarifa faqa miná ufa iriséeqa nári máaqaki mara quqáseeqa andeeqásee Ánutuna aanára máriranara Apooroosána aamúa qímariqau.

²⁷Apooroosafa Kirisa máqa maaqai fíraree qímasoofaqa Eefeesusa máqusannaasa Yísuna ufa írimarusa miná ákaqaafasaakírausa dadaaqíra ufa pásaki maaqí qímasee ákarariqau. Ínnee Kirisa máqannaasa ínnee ámiqimasee maa-fasiqána óonu áfiqeeqee quqáaqa. Miqímasee ákara rúmmamufanoo máreefinau. Kirisa máqa maaqai máridanoo Apooroosafa Yísuna ufa írimarusa firaaqóo dadaaqinau moómoosa Ánutufa kukéeqasee dadaaqufaqa Yísunara irisée minásaa mundímariqau. Miqírausa Apooroosafa dadaaqímarinau.

²⁸Yuda máqannaasa faqa akooqóo maqúsa qambaanai Apooroosafa óori runúseenoo Yuda máqannaasa Yísunara afeekaikámasee qímannimufaqa moómoosa Yísunara dóo kúqaa ánoonee qímariqau. Apooroosáfa Mooseena sándufakinaana tamummáqara fasiqa ákarakinaana Ánutuna ásauku mundírafa kúqaa Yísufa márinara uqannífiqasoofaqa moómoosa íriqa kúqaa Yísufa Ánutuna ásauku mundíra fee qímariqau. Apooroosáfa mi-maqusánaki máridanoo Yísuna ufa írimarusa poodúqamánnimaqanau.