Ni Gi 22:30-40

³⁰Lakea a donki i ta maea, “Iau a donki vomu o rike nau na tahuna a karaba vona i valai i harena mona. I hosi, iau a rata maea ioe?” Lakea e Balam i koli i ta maea, “I uka”.

³¹Lakea e BAKOVI DAGI i vakapalalea a matane Balam, i masia a agelo ne BAKOVI DAGI i pesi kari a dala, i toto silala a bainat vona. Lakea i tabuli ngalabarara puru na malala.

³²Lakea a agelo ne BAKOVI DAGI i takia, i ta maea, “I navai o hotu balaka tolu maea a donki vomu? O longo, iau a valai a pesi karia a dala, ga gege ioe, a vuhuna iau i uka ma vivi vomu go vano.”

³³Pali a donki vomu i matai iau i polo lele nau balaka tolu. A donki i uka ma ge polo lele, bara rabalaki ioe pali, pali a donki bara i mahuri.

³⁴Muri e Balam i koli a ngavana agelo ne BAKOVI DAGI, i ta maea, “Iau a ratea a rabu hale i uka ma i kamumu, i uka ma lohoka vomu o pesi karia a dala. Ngane i uka ma o vivi vona a nilaho nau, ga hamule na tanga.”

³⁵Pali a agelo ne BAKOVI DAGI i takia, i ta maea, “I uka maki, o vano turana e huriki nga. Pali a ngaru ioe go taki kunana a ngava nau, a ngava ranga naha ni taki.” Lakea e Balam i vano turana e huriki a bolekori ne Balak.

³⁶Na tahuna e Balak i longoa e Balam i laho valai na dala, lakea i vano i taguia na tanga dagi e Moab. A tanga iea i pesi tabukoi na naru e Arnon, ra nagi ne Moab.

³⁷Lakea e Balak i takia e Balam, “Muga a rudu e huriki a vinuru ri lakene ri taki tora ioe go valai. I navai i uka ma o valai? O luhoi iau a keri ni habi a mahala vomu?”

³⁸Lakea e Balam i koli i ta maea, “Naha ni ta kupo lae, iau a valai pali. Pali ga vakalongo kunana a ngavana Vure i habi nau. Iau a keri ni rata a ngava ranga.”

³⁹Muri e Balam i vano turane Balak ru lakea na tanga e Kiriat-Husot.

⁴⁰Lakea e Balak i rabalaki ranga bulmakau a sipsip, ge a nihabi. I habi ne Balam ne huriki a bolekori vona ranga balena.