Ni Gi 21:12-25

¹²Muri ri pea a hini nga, ri vano ri rata a mada na maloku ne Sered.

¹³Muri ri pea e Sered ri tulu poloa a naru e Arnon, ri rata a mada na tabeke mule sike na naru e Arnon, na tabeke i ngeki. Ra tabeke i ngeki iea i dili na robo ne huriki a Amor. Ra naru e Arnon i nagi a robo e Moab e Amor.

¹⁴A Puhu na Nuverei na Vabinga ne BAKOVI DAGI i taki a tanga e Vahep na tabeke ne Supa, a maka maloku na naru e Arnon,

¹⁵turana a maka maloku i lokovonga i harena na tanga e Ar, i lokovonga i harena na robo e Moab.

¹⁶Muri ri pea a tabeke iea ri vano ri bele o Bia, ra tanga iea i tahoka a naru ni keli. Ra tabeke e BAKOVI DAGI i takia e Moses vona a naru iea hosi, i ta maea, “O gale palupu e huriki a bakovi a ngatavine ga habi a naru ne ria.”

¹⁷Na parava iea e huriki a Israel ri ratea tara linge, ri kaloloa: “Naru, o bubu rike, o tua lokovonga, mi gi masia mi gi kalolo a linge na nivivi.

¹⁸E huriki a gare ri bole a kodo-hariki, ri kelia a lomu iea.” Muri ri pea a tabeke i ngeki iea ri lakea na tanga e Matana.

¹⁹Ri pea e Matana ri lakea na tanga e Nahaliel, muri ri pea e Nahaliel ri lakea na tanga e Bamot.

²⁰Ri pea e Bamot ri lakea na maloku ne Moab. Ra maloku iea i tabukoi na lolo e Pisga. Ra lolo iea e huriki bara ri pesi vona ri tuva lakea na tabeke i ngeki.

²¹Muri e huriki a Israel ri rudu a vinuru ne Sihon a hariki o Amor, ri ta maea,

²²“Mi gi laho polo vona a robo vomu. I uka ma mi gi page dili mai a maka hania na vit o a hania na vain ne mua. A naru ne mua na lomu ranga i uka ma mi gi ninu. Mi gi ramai kunana a dala dagi na hariki, bara mi pe mule a robo ne mua.”

²³Pali a hariki e Sihon i marikoi. I gale palupu e huriki a nugumaheto vona, ri lakea na tanga e Iahas na tabeke i ngeki, ri vaubi turane huriki a Israel.

²⁴Pali e huriki a Israel ri rabalaki na bainat e huriki a Amor ri ala kupo, ri bolea a malala ne ria, i vakatubu na naru e Arnon, i vano i harena na naru e Iabok na tabeke mule sike. Ra hini nga a harena a robo e Amon. E huriki a Amon ri tahoka e huriki a tara na maheto ri tora hateka, ri tagaria a harena malala ne ria.

²⁵Lakea e huriki a Israel ri bolea a tanga e Hesbon, turana a maka tanga tabukoi vona. Ri bole lobo tabu a maka tanga ne huriki a Amor, ri made vona,