Ni Gi 14:7-36

⁷Lakea ru taki e huriki a bakovi a ngatavine ru ta maea, “Ra malala mi laho polo vona i kamumu hateka.

⁸E BAKOVI DAGI ge vivi ne hita bara, i bole lakea hita vona malala iea i kamumu hateka ni varo a maki ni kani vona, bara i habia ne hita.

⁹Naha ni longotaro e BAKOVI DAGI, naha ni mangenge ne huriki ri made vona a robo iea, ria a maki tavula, bara si ratapile ria. E BAKOVI DAGI i made turane hita. I ratapile pali e huriki a vure taminga ta i matakari ria. Naha ni mangenge ne ria.”

¹⁰Pali e huriki a Israel i uka ma ri ngarua a ngavane Keleb. Lakea ri taki ta ri gi padi rua na kedo, ru gu mate. Ta ri gi rata mavonga, i malaviriri kunana e huriki ri masia a nipara dagi ne BAKOVI DAGI i para polomeli na Kape na Vaponga. Lakea i uka ma ri padi rua na kedo.

¹¹E BAKOVI DAGI i takia e Moses i ta maea, “Ge balaka riva e huriki nga ri gi longotaro iau? I uka ma ri luhoi tora iau. A rata a maka nivakasiri ri matai, pali i uka ma ri luhoi tora iau.

¹²Ngane ga rudua a gilanga dagi ge ratapile ria. Pali iau ga rata ioe, ge ioe a kabu dagi i gao hateka ne ria.”

¹³Pali e Moses i koli i ta maea, “BAKOVI DAGI, na nitora vomu, o bole tala ria o Egipto e huriki o tuli valai ria koea. Ioe bara o ratapile ria, e huriki a Egipto bara ri longoa a velengana a naro o ratea ne ria.

¹⁴Bara ri vakalongo e huriki ri made vona ngane na robo iea. Re huriki nga ri longoa pali a velengamu o made turane mia, o bele kavakava na tahuna a bubu vomu i pesi langa na matana kape. O made na bubu na haro, na rodo o made na kanono o muga mia.

¹⁵Ioe bara o rabalaki palupu lobo e huriki a tara vomu, e huriki a tara ranga ri longoa a ramu i dagi, bara ri ta maea,

¹⁶‘E BAKOVI DAGI i keri ni tuli e huriki a tara vona ri gi lakea na robo i ta muholi vona hosi ta ge habia ne ria, lakea i rabalaki ria na tabeke i ngeki.’

¹⁷“Bakovi Dagi, a ngaru go vakasiri a nitora dagi vomu o ratea a maki o ta muholi vona go ratea. Ioe kunana o ta maea,

¹⁸‘Iau, e BAKOVI DAGI, i uka ma ge madihi malaviriri a hategu. A ngaru hateka e huriki, pali ga muri mai vakaroro a nitagu. A puga vuroki a naro hale na tagenga ne ria. Pali bara vakamadihi e huriki ri rata a naro hale, ge ramai a hamone ria, ge harena ne tamarane ria, e kukulimane ria.’

¹⁹BAKOVI DAGI, ioe o ngaru mia lobo i uka ma o mapulo kilala. I mavonga a nana ioe go puga vuroki a naro hale ne huriki nga, i manga a hini o rata na tahuna ri pe e Egipto i valai i harena mona, o rata vakaroro i valai i harena mona.”

²⁰E BAKOVI DAGI i longo a nitane Moses, i koli i ta maea, “A puga vuroki pali a naro hale ne ria i manga a hini o taki iau vona ga rata.

²¹Iau a Vure mahuri, a nitora, a nipara nau i tabuli na tabeke lobo na malala.

²²I muholi hateka e huriki a bakovi a ngatavine ri longotaro ri toha iau, i uka ma ri gi lakea na robo ta ga habia ne ria. Ri masia a nipara i vakasiri ria ne nau a made turane ria. Ri matai a maka nivakasiri a rata pali o Egipto a rata pali na tabeke i ngeki. Pali ri longotaro vakaroro a nitagu.

²³I uka liu tara ne ria ge dili vona a robo iea a ta muholi vona, ta ga habia ne huriki a hamone mua.

²⁴Pali a vora nau e Keleb, a niluhoi vona i tebi, i ramaia a ningaru nau muholi. Ngane ga taparaki lokovongea vona a robo i masia pali, ge made vona, muri ge bolea e huriki a hamona.

²⁵Ra robo iea e huriki a Amalek, a Kenan ri made na maloku vona. Kuduvi, mua lobo mu mariu tala mu hamule lakea na tabeke i ngeki, mu laho lokovonga na Dari Vururu.”

²⁶E BAKOVI DAGI i taki e Moses e Aron i ta maea,

²⁷“Balaka kupo e huriki a tara hale nga ri tapuhaki bala nau. A longo pali i tohai a kuligu vona a nitane ria. Garika ri gi voro taparaki a nitane ria?

²⁸Ngane o taki ria vona a nitagu, a ta maea, ‘Iau e BAKOVI DAGI a made vakaroro a ta muholi ne mua, a longo mua pali mu taki ta mu gu mate iene, ngane ga rata manga a hini mu taki.

²⁹Na tahuna mu mate, a podane mua bara ri tabuli viliha na tabeke i ngeki. Mu tapuhaki mu ta hateka nau. Ngane e huriki a bakovi ri tahoka a pida i ravulu rua i rike, i uka ma ri gi lakea vona a robo iea.

³⁰A ta muholi ta ga bole mua, mu gu made vona a robo iea, pali ngane mua lobo i uka ma mu gu vano. E Keleb e tune Iepune, rua e Iosua e tune Nun kunana ru gu vano.

³¹Mu taki e huriki na robo iea, ta ri gi vaubi turane mua, ri gi rangi mua, ri gi bole e huriki e tune mua. Pali i uka. Iau bara taparaki e huriki a koma nga ri gi lakea na robo ra i uka ma mu ngarua, bara ri bolea ri made vakaroro vona.

³²Pali mua i uka ma mu gu lokovonga, bara mu mate, mu bera na tabeke i ngeki iea.

³³E huriki e tune mua bara ri laho viliha na tabeke i ngeki na pida i ravulu va, ge harena na tahuna mua lobo bara mu mate. Mu ha taro iau, mu manga a ngatavine i ha taro e girihina i ngoi viliha lae. Lakea e huriki a koma bara ri bole a maregoa na naro hale ne mua.

³⁴Mu lakea vona a robo iea, mu masia na parava i ravulu va. Ngane bara mu bolea a maregoa na naro hale ne mua, ge harena na pida i ravulu va. A pida i taku ge bole a murina a parava i taku, ra mu kasisia a robo iea. Ra naro iea ge rata mua bara mu lohoka vona iau i uka ma ngarua a naro na tagenga ne mua.’

³⁵Iau, e BAKOVI DAGI, a ta muholi bara vakalobo e huriki a bakovi a ngatavine, ri tahoka a niluhoi i taku ni tagege ni ngalahere nau. Mua takutaku bara mu mate koea na tabeke i ngeki. Iau e BAKOVI DAGI a takia a ngava iea.”

³⁶E huriki a bakovi e Moses i rudu ria ri gi kasisia a robo iea ri hamule, ri tami e huriki ri ta maea, “A robo iea i hale. Ra ngava iea kunana i rata e huriki ri deke ne BAKOVI DAGI.” Lakea e BAKOVI DAGI i ratea a gilanga dagi i bele ne huriki a bakovi nga, ri malaviriri kunana ri mate.