Nedenuk kara Tutuin 2:12-40

¹²Basa sara nado bafa bese mboo, de esa natane esa nae, “Talo bee de bisa dadi talo naa, ee? Sosoa-ndandaan hata naa?”

¹³Tehuu hambu hatahori laen nara rakatitiik kasa. Hatahorir raa rae, “Heeh! Boso hosek kasa! Te hatahorir raa, mafu ralan seli na!”

¹⁴Numa naa, Petrus no Lamatuak Yesus nedenun kasalahunu esak laen nara. Boe ma Petrus nggani mata neu, de ana kokolak neu hatahori noꞌuk fo mana rakarumbu ruma naa. Ana kokolak nahere nae, “Ina-ama, toranoo, kaꞌa-fadi nggara ein! Ei fo hatahori Yahudir ma ei fo mana mai leo nai kota Yerusalem ia! Pasa ei ndiꞌi doom matalolole fo nenene au kokolang ia, huu hambu dedeꞌak nenenin lenak fo au nau afadan neu ei basa ngga.

¹⁵Ei boso duꞌa mae, hatahori iar mafu. Ta bisa dadi talo naa! Masanedak, te ta hambu hatahori esa ninu mafuk bei huhua anak. Hata-bali hatematak ia bei fo liꞌu sio huhuan!

¹⁶Ei basa ngga mamanene hatahori iar kokolak pake ei esa-esak dedeꞌam. Ndondoon talo ia: Lelek naa, Manetualain nafada memak dedeꞌak ia pake Ndia mana toꞌu dedeꞌan Yoel ena nae:

¹⁷‘Manetualain kokolak nae, “Mete ma faik kara sangga rateꞌe, na, Au ae fee Au Dula-daleng, sama leo mboꞌa-totoli oe neu basa hatahorir. Ei ana tou anam mara ma ina anam mara, neu ko Au pake sara dadi neu Au mana toꞌu dedeꞌang. Ei ana feꞌo-taꞌem mara, neu ko mete-rita hata fo Au ae atudu neu sara. Ma ei hatahori lasim mara, neu ko rala meꞌi hata fo Au ae fee sara mete-rita.

¹⁸Ndaa neu fair fo sangga rateꞌe ena naa, Au akonda Au Dula-daleng neu Au neondang nggara. Au fee neu touk kara, ma Au oo fee neu inak kara boe. Neu ko ara kokolak hata fo Au afada neu sara.

¹⁹Neu ko Lamatuak Fain losa. Faik naa ta bei mai, tehuu Au tao akahuluk tanda heran nara rai lalai lain. Tanda heran ndia leo ledo dadi makiuk; ma bulan oo dadi mbilas sama leo daak boe. Au oo ae tao dedeꞌa ta hohoꞌak kara nai dae-inak dae boe. Dedeꞌak kara raa, nok bali daak, aꞌi mbilak, ma aꞌi masu bubuak kara hene lain reu. Neu ko losa Lamatuak fai ta hohoꞌan nara raa, hatahori fo nanggou noke tutulu-fafalik neu Lamatuak, sira raa ndia hambu masoi-masodak.’ ” Naa, ndia lele uluk Yoel surak kana ena.

²²Toranoo Israꞌel nggara ein! Pasa ei ndiꞌi doom fo nenene hata fo au nau kokolak hatematak ia. Manetualain henggenee memak Yesus, hatahori Nasaret naa. Ita bubuluk ena tae, naa ndaa, nahuu ita mesa ngga mete-tita Manetualain pake Yesus fo tao tanda heran nara ma hata ta hohoꞌak kara. Ei oo bubuluk dedeꞌak ia ena boe, nahuu Yesus tao tanda heran nara raa numa ei taladam ena.

²³Tehuu ei makanisan, no dalak ei miu fufudi hatahori manggarauk kara fo ara paku risan neu ai ngganggek lain. Naa te Manetualain bubuluk basa naar numa lele uluk mai ena, fo memak ndaa no Ndia nanaen.

²⁴Memak ei tao talo naa losa Ana mate tetebes ena. Tehuu Manetualain ta nau Yesus mate nakandoo. Huu naa de Manetualain buka nakamboꞌik kana numa mamates koasan mai, ma tao nasoda falik kana. Te mamates koasan ta bisa nasenggi sana na.

²⁵Lele uluk mane Dauk surak memak laꞌe-neu Yesus naa ena, talo ia: ‘Au bubuluk Lamatuak soa sama-sama no au. Huu naa de ta hambu hata esa boe na bisa tao natuda au, nahuu Lamatuak nai au boboang taa-taa.

²⁶Huu naa de au daleng namahoko; de au koa-kio akandoo soa-neun, ma au matu-matu ahani a neu Lamatuak leo.

²⁷Ana ta ela au samaneng leo nakandoo nai hatahori mates mamanan. Ma Lamatuak ta ela Ndia Hatahori Malalaon naa, ao-mbaa mamaten dadi mburu naboo nai rates dale.

²⁸Lamatuak natudu au eno-dala masodak tetebes ena. Huu naa de au daleng namahoko nalan seli, te Lamatuak sama-sama no au na.’ Naa ndia lele uluk mane Dauk surak kana ena.

²⁹Basa toranoo nggara ein! Hatematak ia fee au lelak dei, fo au kokolak ledo-ledo ua ei laꞌe-neu ita baꞌin Dauk. Ana kokolak talo naa, tehuu ana ta dudu neu ndia ao-ina heli-helin. Huu ana mate ena, ma ratoi henin ena. Ndia raten bei hambun nai ita taladan losa faik ia.

³⁰Mane Dauk naa dadi neu Manetualain mana toꞌu dedeꞌan esa. Ma ana bubuluk nae, Manetualain helu-bartaa pake sumba-sook nae, Dauk tititi-nonosin esa neu ko toꞌu parenda, ndia Hatahori fo Manetualain henggenee memak kana numa lele uluk mai naa ena.

³¹Lelek naa, Dauk mete dook mata neu. Ma ana nafada nakahuluk laꞌe-neu Hatahori fo Manetualain henggenee memak kana naa ena. Neu ko Hatahori naa mate, tehuu Ana oo nasoda fali numa mamaten mai boe. Boe ma Dauk oo nae, Hatahori naa ta leo nakandoo nai hatahori mates sara mamanan, ma ao-mbaa mamaten ta dadi mburu naboo boe.

³²Hatahori fo Dauk seseik kana naa, ndia Yesus! Manetualain tao nasoda falik kana numa mamaten mai ena. De ita basa ngga ia mete-tita to ita mata deꞌe heli-helin Ana nasoda fali numa mamaten mai ena!

³³Ma hatematak ia Manetualain soꞌu nala Yesus fo toꞌu panggak demak mateꞌen. Ana nanggatuuk nai Manetualain boboa konan, nai mamanak fo Manetualain sadia memak kana ena. Ma Ndia Aman fee Dula-dale Malalaon naa neun ena, ndaa leo Manetualain helu-bartaa memak kana numa lele uluk mai ena. Ana oo helu-bartaa nau fee ita Ndia Dula-dale Malalaon naa boe. Dadi Manetualain fee Ndia Dula-dalen, ndia hata fo ei mamanene ma mete-mita hatematak ia.

³⁴Dauk mesa kana ta hene neni nusa tetuk do inggu temak neu, tehuu ana surak nae, ‘Manetualain kokolak no au Lamatuang nae, “Manggatuuk muu Au boboa konang nai mamanak fo Au sadia memak kana ena,

³⁵losa Au tao O musum mara holu ei neu O.’ ”

³⁶Huu naa de basa hatahori Israꞌel muste bubuluk tebe-tebe laꞌe-neu Yesus naa, fo ei paku makanisan numa ai ngganggek lain ena. Ndia naa, Karistus fo Manetualain henggenee memak kana numa lele uluk mai ena. Ma Ndia oo, ndia naena haak parenda neu ita boe!”

³⁷Hatahorir raa ramanene rala naa, boe ma dalen nara neni mbambauk memak kana. De ara ratane neu Petrus ma nedenuk laen nara rae, “Kaꞌa nggara ein! Ai muste tao hata bali?”

³⁸Boe ma Petrus naselu nae, “Ei esa-esak muste laꞌo ela basa ei kilu-salam mara lalaꞌen fo tungga falik Manetualain. Basa naa, ei muste moke fo hambu sarani, fo dadi tanda nae, ei fali tungga Yesus Karistus Eno-dala Masodan ena. Naa oo dadi tanda boe nae, Manetualain koka heni ei sala-singgom mara ena. De ei oo hambu Manetualain Dula-dale Malalaon boe.

³⁹Huu Manetualain naa, ndia ita Lamatuan fo helu-bartaa memak dedeꞌak naa soa-neu basa hatahorir fo mana maso dadi neu Ndia hatahorin ena. No dalak naa, Ndia hehelu-bartaan naa, soa-neu ei ma tititi-nonosim mara. Ana oo helu-bartaa soa-neu hatahori laen nara boe.”

⁴⁰Petrus bei kokolak no loa-naruk neu sara talo naa, fo nafada sara nae, “Hatematak ia hatahori noꞌuk ka sio laꞌo ela eno-dala masodak tetebes ena. Huu naa de ei muste besa-besa, fo ei boso tungga hatahori manggarauk kara eno-dalan. Tehuu ei muste tungga Manetualain eno-dala ndoon a mesan. No dalak naa ei hambu masoi-masodak fo masoda seku neu sama-sama mia Ndia.”