Nü'arisixi 2:9-38

⁹Parutiyatari, Meriyatari, 'Eramitatari, Mesuputamiyasie temütama, Cureyasie Caparusiyasie Punitusie 'Asiyasie

¹⁰Püriquiyasie Pamüpiriyasie 'Equipitusie 'Apüricasie Sirene temütama, Xumatari memü'ivatatüve,

¹¹Huriyusixi, hipatü Huriyusixi memacü, Cüretatari, 'Araviyatari, tanaitü tepüva'enie me'utiniucame taniuquicü, que mütimarive Cacaüyari me'utiyuaneme.

¹²Yunaitü meni'iyarixiecaitüni, 'asimepücatemaicai quetütü mütiyüanecai, yuxexuitü müpaü meteyücühüavetü, Que tititari 'icü.

¹³Hipatü mevananaimatü müpaü meniutiyuanecaitüni, Mepuhuxa xeicüa vinu macacacü.

¹⁴Hicü Pecuru 'anucuqueca tamamata heimana xevime vahamatü, carima niutaniuni, müpaü tinivarutahüave, Neuxei Huriyusixi, yunaitü Querusareme xemütama. Xequetenemaica 'icü, xequeneneu'enie que nemütayüni.

¹⁵'Ime mepücatarüve xeme xemütecu'erivapaü, 'esiva xeicüa tucari püxüca.

¹⁶Masi 'icü canihücütüni tita mütixasivacai, tixaxatame Cuheri ya'utainecacu,

¹⁷Müpaü paine Cacaüyari, tucari 'aye'ayu quepaucua mütaparirümeni, müpaü pütiyüni. Ne'iyari nepütatuani teüteri yunaime vahesie. Xenivema nehesie mieme mepütaniuni 'uquisi 'ucari, Xetemari hecüta heinüsipaü 'aneneme mepüxeiyani, Xe'uquiravesixi cusipa mepüteheinüni.

¹⁸Yuricü müme nemütiva'aitüa 'uquisi 'ucari vahesie Ne'iyari nepütatuani 'iya tucarisie, Nehesie mieme mepütaniuni.

¹⁹Nepüvahüxiyasitüani vaheima muyuavisie, Hetüanata cuiepa 'inüari nepütiyurieni vaücava, Xuriya, tai, 'aüxi cüsi nücame 'inüariyari.

²⁰Tau yüvitü canayeimücü, Meserita xuriya payani. 'Arique 'upamie Ti'aitame mücü tucarisie marivemesie xavatümesie.

²¹'Anarique yunaitü memihüaveni que mü'ane Ti'aitame mühücü, Müme mepütavicueisitüarieni.

²²Neuxei 'Ixaherisixi, 'icü neniuqui xequene'enieca. Cacaüyari xesata pitahecüataxü Quesusi Nasaretitanaca marivemecü tiyurienetü türücaüyemecü, 'inüari tiyurienetü, 'iyacü que mütiuyuri Cacaüyari xesata que xemütemate xeme.

²³Cacaüyari müpaü tiyücühüavetü, matüaripai müpaü timaitü, nicayeni müyetuiyanicü. 'Inüari sanamete xetevaruta'aitüaca xeniviya, vamamacü cüyesie xe'icavieca xecanimieni.

²⁴Cacaüyari nenucuquetüani 'ixünaca que mürehüiyacai müquitü. 'Iya pücayüvecai müquitü muyuhayevacü.

²⁵Raviri müpaü paine hepaüsitana, Ti'aitame nepüxeiyacai yuheyemecü nehüxie, Neserieta mutivecü nepücacuyuani.

²⁶Ne'iyarisie 'ayumieme nepünetemavi, Nenetemavietü nepütaniuni nenenicü. Sepa necaxari 'amuca, Mexi neta'icueva yuri nepüti'erie

²⁷Quename ne'iyari peca'ucu'eirieni müquime. Que mü'ane pemupataxü 'ahesie mieme pepüca'ipitüaca mütapüne.

²⁸Pepünesi'utamaricasitüa nemayeyurinicü. Temavierica pepünesipitüaca vaücava, nehamatü pe'uyeicatü.

²⁹Neuxei 'ivamarixi. 'Aixüa cani'aneni heiseriemecü mütixecuxaxatüvanicü tatevari Raviri hepaüsita. Caniumüni 'iya, tiucateuqui, macateuquesie mana tiuca cuxi tasata hicüque.

³⁰Tixaxatame hücütütü catinimaicaitüni quename Cacaüyari 'üyühüritüa heiseriemecü müpaü 'utaitü, xevitü Ravirisie müyeyaniquecai heiserie püpitüarieniquecai Cürisitutütü, picayeniquecai 'uvenieya müra'aitasie haitü.

³¹Matüaripai 'ixeiyatü müpaü caniutayüni, Cürisitu que müranucuque ticuxatatü, müpaü 'utaitü, 'Iyarieya püca'ucu'eirivaxü müquitü, Vaiyarieya püca'utapünixü.

³²Mericüsü Cacaüyari penucuquetüa 'iya Quesusi. Tame tanaitü tepühüme temunenierixü temitahecüata.

³³'Anutivitüquieca Cacaüyari serieta, nitanaqui'erieni tita 'uquiyarieya mütitahüavixü mütipitüaniquecai, 'Iyari Mütiyupata hücütüme. Mücü niutatuani que xemüte'ixeiya que xemüte'i'enie.

³⁴Mücü Raviritütü püca'anutitüa muyuavisie, siepüre müpaü paine, Ti'aitame müpaü tinitahüave 'iya müneti'aitüva, Neserieta mexicuxi quenacani

³⁵Müme memümasi'aca'unie nemüva'atüani 'ahetüa.

³⁶Heiseriemecü 'ipaü xequetenemaica yunaitü 'Ixaheri quie quiecatari. Cacaüyari Ti'aitame payeitüa 'icü Quesusi, heiserie canipitüani que mü'ane xemumi curuxisie.

³⁷Mericüsü me'u'enanaca yu'iyarisie mepühiveritüariecai. Müpaü metenivarutahüave Pecuru hipame nü'arisixita,

³⁸Que teteyurieni ta'ivama. Pecuru müpaü tinivarutahüave, Xequeteneuhayeva que xemüteyurie, yuxexuitü xepüca'üyarieni Quesusi Cürisitu xehüavetü. Tita 'axa xemüte'uyuri, xepüteheuyehüviyarieni. Xepütemiquieni 'Iyari Mütiyupata.