Kapyegee 2:9-38

⁹Wèe pii pu wa naha ge, pii ya yìri Pariti fiige ki ni, ni Medi fiige ki ni, ni Elamu fiige ki ni, ni Mezopotami fiige ki ni, ni Zhude fiige ki ni, ni Kapadɔsi fiige ki ni, ni Pɔn fiige ki ni, ni Azi fiige ki ni,

¹⁰ni Firizi fiige ki ni, ni Panfili fiige ki ni, ni Misira fiige ki ni. Libi fiige ki kulogoo kii ki wa Sirinɛ kulo li kabanugo ge, a pii di yìri wà, a pii di yìri Oromɛ kulo li ni.

¹¹A pii di yìri Kirɛti fiige ki ni, a pii di yìri Arabuu fiige ki ni. Wèe bɛɛri ni, pii ya sii pye Yawutuu yɛ pyaa, pii dʼa jé Yawutuu pu wo koo li ni. Wèe bɛɛri nigin nigin wu ɲɛ na Kilɛ wo kagbɔhɔɔ ki nuri pu ɲɔ na wù wo shi jomɔ pu ni.»

¹²A lʼi bye kakanhana pii sipyii pii mu, fo pu ya cɛ yekɛ pu da da yu wɛ. A pʼi ganha na puyɛ yegee na: «Ɲaha wuu li ɲɛ le wɛ?»

¹³Ga, a pii di ganha na nʼa daa fɛɛ pu la wo pii sipyii pii ni na yu na: «Duvɛn pʼa gba tin.»

¹⁴Wee tuun wu ni a Pyɛɛri di yìri yere ni tudunmɔɔ kɛ ni nigin wu samaa ni, na wu mujuu ɲuŋɔ yirige, na sipyii pu pye: «Yee piimu pu wa Yawutuu ni yee piimu samaa bɛɛri pu wa Zheruzalɛmu ni ge, yi niwegee shan. Ye nʼa da jo yi mu ge, yʼi yi logo, yʼi yi ɲaha cɛ.

¹⁵Pii sipyii pii ya ta gba wɛ, ma na jo ba yee wa yi funyɔ kɔɔn kɔngana lemu na wɛ. Bani ke ɲisɔɔgɔ ke tuunɔ ɲii gbarashɛɛrɛ wu na, ɲiga sanha mugi wa wu toro gba ma tin wɛ.

¹⁶Ga Kilɛ tudunmɔɔ Zhowɛli bi keree kiimu jo fo taatuunnɔ ni ge, kee ki wa byi mɛ nimɛ. Wʼa bi jo na:

¹⁷‹Kilɛ ya jo na: Koŋɔ ki taaxɔɔ li ba nɔ, nʼa da na Munaa li tirige sipyii pu bɛɛri na na ɲɛhɛ. Wee tuun wu ni yi jalaa ni yi pushaa na ba keree nibaŋaa nuri Kilɛ mu na yu. Yi lɛvɛɛ pu na ba kashɛgɛɛ ɲaa; yi nɔhɔlɛɛ pu na ganha na nɛ wo keree ki ɲaa ŋmunuyɔ ni.

¹⁸Oo dɛ, yee caya yi na kunni, nɛ na ba na Munaa li tirige na kapyebyii pu na na ɲɛhɛ: namaa fara cèe na, pʼa ganha na keree nibaŋaa yu nɛ mɛgɛ na.

¹⁹Nɛ na ba kakanhaŋaa kii pye fugba we ni, na ɲaha shɛshɛɛrɛ ta pye ɲiŋɛ ke na: shishan, ni na, ni kakunnuŋɔ wurege wogo.

²⁰Nibiige na ba jé caŋa ki ni, yeŋɛ ki na ba ɲaaŋa ba shishan ɲɛ wɛ. Lee kadugo na Kafɔɔ wo caŋa ki na na nɔ. Kee caŋa ki na ba bye cagbɔhɔ, kemu nɔɔrɔ ya pɛlɛ ge.

²¹Wee tuun wu ni sipya bɛɛri wu da ba Kafɔɔ mɛgɛ yiri ge, weefɔɔ na ba shɔ.›»

²²A Pyɛɛri di shɛ ɲaha na sanha na jo: «Izirayɛli shɛɛn yi niwegee shan, yʼi na jomɔ pu logo. Nazarɛti shɛɛn Yesu bye sipya wemu ge, Kilɛ ya wu shɛ yi na. Wʼa kagbɔhɔɔ pye yi niŋɛ ni, na kakanhaŋaa pye, na ɲaha shɛshɛɛrɛ pye Kilɛ fanha ni; yiyɛ pyaa ki bɛ wa lee cɛ.

²³Pʼa we ná we le yee keŋɛ ni, a yee di wu kan Kilɛ-cɛbaalaa mu pʼa kori tige na na gbo. Kilɛ bi lee cɛ yaha, ni lee wu bi sii gbegele wu kaa na.

²⁴Ga Kilɛ ya wu ɲɛ, na wu yeege xu ni. Kee fanha ki bi bye bɛ xu mu wu já Yesu mara wɛ.

²⁵Bani ye saannaa Dawuda ya jo wu shizhaa na ge, yee yi wa mɛ na: ‹Nɛ bi Kafɔɔ ɲaa tuun bɛɛri ni na ɲahagbaa na, bani wu bi ma bye tuun bɛɛri ni nɛ kanige cɛ, kɔnhɔ yafiin ganha da na ɲɛhɛ wɛ.

²⁶Lee wuu na nɛ zɔ we ya ɲi fundanga na, a nɛ jomɔ bɛɛri di bye fundanga jomɔ. Ali faŋa bɛ ni, nɛ dà li na jo na ceepuuro ti na ba ŋmɔ ɲaɲiŋɛ na.

²⁷Bani mu wa da ga gbara nɛ munaa li kori Adɛsi ni wɛ. Ma di wa da gbara ma Fɛfɛɛrɛ Sipya wu ceepuuro ti fɔnhɔ faŋa ni wɛ.

²⁸Mʼa ɲìi sicuumɔ nivomɔ pu korogoo ki shɛ na na. Na mu yaha ni nɛ ni, mu na da nɛ zɔ wu ɲini fundanga na.›»

²⁹A Pyɛɛri di shɛ ɲaha na sanha na jo: «Na ceboronamaa, yi yere di wu tolɛ Dawuda keree fiinŋɛ jo yi mu. Wèe tolɛ Dawuda ya xu, a pʼi wu le. Ali niɲaa we bɛ ni wu faŋa ki wa naha wù mu, wu kulo li ni.

³⁰Ga Kilɛ tudunmɔ wu bye Dawuda. Ni wu bi li cɛ bɛ sanha na Kilɛ wʼa ɲɔmɛɛ lɔ wee mu, na kaaga bɛ kàa na taha li na na wee Kilɛ na ba Dawuda wo Ja wa teŋɛ caŋa ka wu kadugo yíri, wu saanra koro li ni.

³¹Wee tuun wu ni, Shɔvɔɔ wu bi yaa wu pa ɲɛ foro xu ni ɲɛgana lemu na ge, Kilɛ ya fɛnhɛ lee shɛ Dawuda na. Lee wuu na wʼa jo na: ‹Wu da ba gori xu nibiige ni wɛ, wu ceepuuro tʼa da ba fɔnhɔ faŋa ni wɛ.›

³²Shɔvɔɔ wemu kaa pu wa byi ge, Yesu wu wa wii. Wee Kilɛ ya ɲɛ na yeege xu ni, wèe bɛɛri wa lee wo ɲavɛɛ.

³³Ba wʼa dugi kari fugba wu ni wɛ, na shɛ diin saanra tatɛɛngɛ ki ni Kilɛ kanige cɛ. Wu bi Fɛfɛɛrɛ Munaa lemu wo ɲɔmɛɛ lɔ wèe mu ge, a Kilɛ di lee kan wu mu. A wu bɛ di lee tirige wèe na, ma na jo ba yi wa li ɲaa ɲagana lemu na, na li nuri logogana lemu na wɛ.

³⁴Dawuda yɛ pyaa ya ta dugi kari fugba wu ni wɛ. Ga wʼa li shɛ na: ‹Kafɔɔ Kilɛ ya yi jo nɛ Kafɔɔ mu na: Tiin saanra tatɛɛngɛ ki ni na kanige cɛ,

³⁵fo di ba ma pɛɛn pye ma ɲidahaa tatahaŋa.›

³⁶«Izirayɛli shɛɛn bɛɛri ya yaa na li cɛ na fiinŋɛ na jo Yesu wemu yee ya kori tige na ge, Kilɛ ya wu pye Kafɔɔ, na wu pye Shɔvɔɔ.»

³⁷Ba pʼa pee jomɔ pu logo wɛ, a pu zɔlɔɔ di pu kaala xuuni. A pʼi Pyɛɛri ni tudunmɔɔ pusamaa yege na: «Wù cebooloo, kaa lekɛ wèe dʼa yaa na pye nimɛ wɛ?»

³⁸A Pyɛɛri di pu ɲɔ shɔ na: «Yee ya yaa yee pu daburajɛ jo yi jurumu wu na. Yee bɛɛri nigin nigin wa yaa na batize Yesu Kirisa mɛgɛ na, kɔnhɔ yi wo jurumu wu yafa yi mu. Lee bu bye Kilɛ na Fɛfɛɛrɛ Munaa li tirige yi na.