MII GUN MIINU MO 4:12-31

¹²Dhali mowoṯẖ yisa di’da e wathiŋ kamu/ yisa haali/ gwaya kamu/ yisa di’da i’bame’d momis jin c̱inu ibwaŋ ’kwaniny’cesh ki ana minu mii woṯẖ mo e a’di mo be.

¹³Hili ki uni p̱arkina Buṯerus dhala Yohaan e mo ki uni ’koki ju/ ’kwani mo tani dhali gam gwo ki uni ’koki ta ’kwani kun ’kon mmohila warka/ mo dhali ki uni si’da/ ta ’kwani gun moli to tani uni merkin kagahara mo. Dhali uni nyiṯẖkin ki uni nyaḵki ’ko ka Yesus mo.

¹⁴Dhali mmomisha uni wathi/ jin wac̱u/ mo mmodosh nyaḵki uni mo tani uni moli gwoŋ kamu/ o ap̱o/ a’di mo.

¹⁵Hili ki uni ḵanki uni gwo mo mmo/ii ka pije/ ’peni montul is buni yan mo tani uni ki ṯora ṯor ka rem ’kup̱ mo

¹⁶mmo/o gwo mo ki: Ana mina miiya ta ki ’kwani gwansan sa/? Haali/ ka jiŋ gana/ a’di ṯoru eya tente/ ibwam uni ’baar kun ’kon e Pa Urushaliim mo ki miimer jin misha ’kwani ’baar mo miikunu mo e uni mo dhali ana mola a’di waṯ mo be.

¹⁷Hili jin mina a’di diki p̱ala ibwaŋ ’kwani naskina/ mo tani dhalki ana ḵana uni gwo ki ’bi’th mo ma, gom to kun mina ana ’taki mii ap̱o/ uni mo jin mina uni ’koki ṯor wathiŋ kamu/ ṯal ’de/ gwo mo e gway yan ’peni mo yan ki sule/ mo be.

¹⁸Dhali uni yuḵki uni mo dhali ḵan uni gwo ki uni mini tuḵ gway ma Yesus yan ki sule/ ki sule/ mo mmo’koki ṯor gwo mo walla c̱i gwo ki gway ma Yesus mo.

¹⁹Buṯerus dhala Yohaan thoḵki gwo mo dhali o uni gwo mo ki: Waḵki/ a’di ’boro’d ibwambor ma Arumgimis mo mmoha gwom bum e mo dhali ush ji ma Arumgimis ha e mo tani ’cunycuri um mo ma,

²⁰haali/ am mina mol gwo ush mmoṯor gom to kun mishkina aman mo dhali kun ciḵa aman mo.

²¹Dhali uni, ki uni o uni ki ’bi’th doḵ/e gom to gun mina uni ’taki mii mo tani uni dhalki uni mo mmo/ii mo mmomola uni bway mmogam mo mmoc̱i uni ajisa gom ’kwani mo haala ris ’kwani ’baar mo karkina Arumgimis ki ca mo gom a’di jin miikunu mo be.

²²Haali/ wathi/ yan taki’d gi yili issu/ i/ur ’kup̱ mo jin miikunu miimer i a’di mo be.

²³Dhali mmodhalu uni bway mo mmo/ii mo tani uni iikin c̱em buni mo dhali lolop̱ki gwo ’baar mo kun okina igasiis kun can dhali ’kwaniŋ gwanyjaḵa/ uni mo be.

²⁴Dhali uni, ki uni ciḵki a’di mo tani uni ’de’kki ’twam buniya Arumgimis ki bwan ṯal ’de/ mo dhali o gwo mo ki: Ayy Tap̱a, /e jin uḵki momis mo dhali mony’cesh mo dhali dhan ḵumma/ yi’de/ mo dhala ris to ’baar kun ’kon ibwaman uni mo,

²⁵/e jin o gwo ki Shi/in Dheleladhelel ki ’twa/ ma babam bam ka Dawuu’d jin ta c̱iŋkinam pini ki: Ata miina ’kwani kun ’koki ta ’Kwani Yahuuda/ apure/ mo, dhala ris ’kwani kulum to ka wuny is ibwa kan mowa?

²⁶Tap̱any can gi ’kwaniny’cesh doshkin ki is buni ki ’dishe/ mo dhali itap̱a tuli isi monṯal ’de/ ap̱o/ Tap̱a mo dhali ap̱o/ a’dim piti jin ta’da Ḵrisṯẖos si’da/ mo.

²⁷Haali/ ki gwoŋ gana/ e pa yan ap̱o/ c̱iŋkinam pini jin ta’da Yesus a’di jin karu ki she/ gi dhelel dhelel jin kara /e Tap̱a tani Hirodus uni ka Punthi Bilaaṯus nyaḵki ’kwani kun ’koki ta ’Kwani Yahuuda/ mo dhali ’Kwani ma Israyiil si’da/ mo tani uni ’baar mo nyaḵ is tuli monṯal ’de/ mo

²⁸mmomii a’di yin ki me’d pini mo dhali ki bwam pini jin onu isi ṯwa/a/ ṯwa/a/ innii mo midi war kansan mo be.

²⁹Dhali shwane/ Tap̱a, hiliya p̱o/ gwo gun ona uni ki ’bi’th gom to kun mina uni ’taki mii ap̱o/ aman mo dhali c̱iki c̱iŋkinam pini ’bi’th mo ma mmo/o gwom pini ki dar gi monyju/ ’kwani mo

³⁰me’dyin hedha /e abim pini mmomii miiwac̱ mo dhali ki momer mo dhali dhan mii kun caaca kun minu mii ki gway gi C̱iŋkinam pini jin ta’da Yesus jin karu ki she/ gi dhelel dhelel mo.

³¹Dhali ki uni ’thon mo tani mo yiḵinki is mo e mo jin tula uni is nycine/ mo dhali uni ’baar mo ’tu’dkunu mo ki Shi/in Dheleladhelel mo dhali uni oki gwo ma Arumgimis ki dar gi monyju/ ’kwani mo be.