Aposolo Jaŋere Binaŋ 4:12-31

¹²Bâbâpiaŋ i ŋic moctao moc mi fokac, â ŋic mocte ʒâŋe riwaseckehuc bibiaŋkene i wâc mâreŋko mi fokac.”

¹³Eme Petoro â Johane jahe ŋic omane, mamana ficko mi jukicnezi hâhâwic tâmiric micafec jaha dâŋ mupire manarâ wareckembiŋ. Erâ jahe Jesuhec jupic i hone tarac‐jojambiŋ,

¹⁴â ŋic sahac ɋiɋic eweczi jaherao domame e wâc honehuc irec dâŋ bâtikie‐jacteniŋte basambiŋ.

¹⁵Basarâ ejactepie hae ʒoŋao hurâ domahapire jaŋackoaŋ ʒiŋuc muhuc nazaŋ gazaŋ embiŋ:

¹⁶“Nâŋâc ŋic jahe weniŋuc ejactenaŋ? Jahe mâsi bapire fua tâcneme Jerusalem haeoneczi biŋene biac mana‐fârembieŋ, irec wemocko hemackezo?

¹⁷Eme dâŋ i hae sâc haŋ bame mana‐fârenʒipiŋte mu hâhâwic ejactepene ŋic hâcne ʒâŋe biŋe‐ticne mocwâc mi jaza‐jâmbâŋkezepirec.”

¹⁸Iŋuc murâ hefârec‐jofarâ ʒiŋuc jasambiŋ: “Ŋohe Jesure ʒâŋe ŋic mocwâc mi jaza qazuc ejâmbâŋkezepirec.”

¹⁹Mupie Petoro â Johane jahe dâŋ ʒiŋuc bâtikie‐jarepic: “Ŋoŋe ŋaŋac mana honeniŋ, ŋoŋere dâŋ reŋkehuc Anuture dâŋ qiqikiŋ, irec Anutuzi maname sâckeocmu me?

²⁰Wiac hone manac ehuc jumbeŋ i sâcne mi hesoŋkerâ junaŋmu.”

²¹Iŋuc mupire jaŋe mu hâhâwic dâŋ mocwâc jasahuc râec‐jofapie rapic. Haeŋic ŋokac omane jaŋe mâsi i hone manac erâ Anutu mucne bacnembiŋte jaŋerao quŋkehuc aposolo jahe wiac mi ejactembiŋ.

²²Ŋic sahac ɋiɋic bakicne e puriŋ fohuc juha jara 40 ewec i mana‐fârembiŋ hâcne.

²³Petoro â Johane jahe ŋic tutumaŋkonec waharâ âgo wiacfâc‐jekic jaŋerao rarâ taha bapa micne â soŋaŋ jaŋe dâŋ jasambiŋ irec mu binaŋ ehuc jaza‐fârepic.

²⁴Eme jaŋe i manarâ maŋjeŋic qâzuckerâ Anuturao sâsepie fehame ʒiŋuc mumbiŋ: “Wofuŋ sâko Wofuŋ, go sambâŋ â mâreŋ â hâwec i wiac fuŋne fuŋne‐jeŋichec râemeŋzi

²⁵Tiri Mâro ecnetec eki mimiŋne‐nâŋec Dawidi, kiŋaŋŋicge hâcne, micne baafeckeme dâŋ ʒiŋuc muwec: ‘Qapuc jaŋe wemocte ju fâfânâŋ eeŋgopieŋ, â ŋicne ŋicne dâŋ racne birickeeŋgopieŋ?

²⁶Wofuŋ â Kristo‐ticne râsi ejacteniŋte mâreŋ sâc ŋicwofuŋ jaŋe meo roroc eeŋgopieŋ, â ŋicbomboŋ jaŋe ââte sanaŋ eeŋgopieŋ.’

²⁷“Hae kecʒira ine jâmbomac tiri Ŋokâge Jesu, Kristo âkendâŋnemeŋ, e râsi ecneniŋte Herode â Pilato jahe ŋic qâpuc jaŋehec â Israe ŋic jaŋehec dâŋ ŋiŋihec embiŋ.

²⁸Erâ gahacne mezi â miczi mu bâmoc emeŋ irec sâcmac embiŋ.

²⁹Eme Wofuŋ, ʒi ine mu hâhâwic dâŋjeŋic hone manac ehuc kiŋaŋŋicfâcge hâbi hejaretec mitige hâhâwicmâc munʒepieŋ.

³⁰Ehapie mege sicnetec sahac ɋiɋic â mâsi fuŋne fuŋne tiri kiŋaŋŋicge Jesu ere erâ fua razejec.”

³¹Iŋuc numupie fic, tumaŋnerâ ŋembiŋ, qiriŋ qiriŋ qawec. Ehame Tiri Mârozi maŋjeŋicko fusucmame Anuture dâŋ micafec jaha ŋic jazambiŋ.