Mgo Hinimuan 7:17-38

¹⁷Pogkalugoy,” kagi ni Istiban, “to ogmarani on ka allow no ogtuman to Magboboot ka impanoy din insabut ki Abraham, no nigmohon–ing on ka mgo pinanganak ni Hakub no dio to Ehipto.

¹⁸No ka mgo igbuyag dio to Ehipto, nakaliwanliwan on taman to duon on igbuyag no waro mataga ko hontow si Husi.

¹⁹No ka sikan no igbuyag, niggawayan woy nigbayadbayaran ka mgo kaap–apuan ta. Woy pigpogos din sikandan to oyow ogpoongkoran dan ka mgo anak dan dio to tano oyow ogkamatoy.

²⁰Sikan ka nabayaan dan,” kagi ni Istiban, “no nootow on si Moisis. Maroyow ka pogpitow to Magboboot kandin. No taman to tatolu no bulan, nouyamu si Moisis dio to baloy to amoy rin.

²¹Di ko naang–anggaan on sikandin, nakita on to boi no anak to igbuyag to Ehipto. No pig–uyamu rin on si Moisis no pig–iling din to anak din on ian lagboy.

²²Naanad on si Moisis to tibo no katouanan to mgo taga Ehipto woy mabantug sikandin su dakol ka katouanan din to mgo hinimuan woy to mgo kinagian.

²³No to kohop–atan on ka tuid ni Moisis, nakaroromdom sikandin to ogpanumbaloy dio to ugpaan to mgo karumaan din no mgo pinanganak ni Israil. No to pogpanumbaloy ni Moisis dio to kandan,

²⁴duon nabayaan din no otow no pinanganak ni Israil no nabaybayaran to otow no taga Ehipto. No nigpangabangan ni Moisis ka otow no nabaybayaran woy pighimatayan din on ka taga Ehipto.

²⁵Nahan ni Moisis ko ogpakasabut buwa ka mgo duma rin no pinanganak ni Israil to nigtuud ka Magboboot to sikandin ka ogpangabang kandan no ogkabaybayaran. Di waro dan masabuti.

²⁶Pogkapawo, nighondio man do si Moisis to sikan no ugpaan to mgo duma rin, no nakabayo man do to daruwa no otow no nigpoog–ogotoy. Nigpoul–ulioy on porom ni Moisis to sikan no otow no pigkagian din to, ‘Manio to ogpoog-ogotoy kow to sikan do ka apu now?’

²⁷Di ka sagboka no otow no nig-ogot to duma rin, pigkois din si Moisis to kagi rin to, ‘Manio to sikoykow ka ogboboot kanami? Bak ko sikoykow ka talaghusay noy.

²⁸Koiniat ka buwa ko songo oghimatayan a nu unawa to pighimatayan nu ka taga Ehipto gabii,’ kagi to otow,” kagi ni Istiban.

²⁹“Pogdinog ni Moisis to sikan no kagi, nakapallaguy on no dio mokougpo to mariu no ugpaan to Midian. Dio nangasawa si Moisis. No pogkalugoy, daruwa on ka anak din no lukos.”

³⁰Nigligad on ka kohop–atan no tuid. No songo allow, dio si Moisis to songo bubungan no oghingaranan dan to Sinai no dio to holholawan. No duon suguanon to Magboboot, no nigligkat to Langit no nigpakita ki Moisis dio to malopot no kayu no nalogdog.

³¹Pogpitow ni Moisis to sikan, nabolongbolong. Di kagi to Lagboy no Igbuyag to,

³²‘Sikanak ka Magboboot to mgo kaap–apuan nu, no ian dod ka Magboboot ni Abraham, woy ki Isaak, woy ki Hakub.’ Nigkolkol si Moisis su nahallok no waro niglangob no ogpitow.

³³No kagi to Lagboy no Igbuyag ki Moisis to, ‘Awaa nu ka sapatus nu no itahud kanak su duon a kai to longod nu.

³⁴Nigkita ku ka igkabaybayari to mgo sakup ku no mgo pinanganak ni Israil no dio ogpokougpo to Ehipto. Woy pigdinog ku to ogpakapannanoy sikandan. Sikan ian to niglogsad kuntoon su ogpangabangan ku sikandan. Nò, kai kad su ogsuguon ku sikoykow dio to Ehipto,’ kinagian to Magboboot.”

³⁵Kagi ni Istiban to, “Si Moisis ka pigkois to mgo pinanganak ni Israil no nigkagi ran kandin to, ‘Manio to sikoykow ka ogboboot kanami? Bak ko sikoykow ka talaghusoy noy.’ Di pogkalugoy, si Moisis ka pigsugu to Magboboot dio to Ehipto oyow sikandin on ka ogpangabang kandan no ogkohirapan, woy oyow sikandin ka ogkohimu no igbuyag dan. No ka sikan no suguanon to Magboboot no nigpakita ki Moisis duon to sikan no malopot no kayu, ian ka impatuman to Magboboot to sikan no innangon din.

³⁶Pighinggat ni Moisis ka mgo pinanganak ni Hakub to og-awo sikandan duon to Ehipto. Woy duon mgo kabolongbolonganan woy ka igmalogot to innangon to Magboboot no nohimu rin dio to Ehipto woy dio to sikan no Dagat no Malalab woy dio to nabayaan dan no holholawan to sikan no kohop–atan no tuid.

³⁷Si Moisis dod ka nignangon to mgo pinanganak ni Israil to, ‘Duon uromo talagnangon to kagi to Magboboot no igpohondio din no ogkounawa kanak no igbogoy rin dio to kaniu.’

³⁸Nò, si Moisis ka nigduma to mgo otow no nalimudlimud no ogmanhihipanow to sikan no holholawan. No ka sikan no suguanon to Magboboot no niglibuwas woy nig–al–alukuy ki Moisis dio to Bubungan to Sinai, ungod nigdumaruma kandin woy to mgo kaap–apuan ta. Woy nabogayan si Moisis to sikan no kinagian to Magboboot no ogpokouyag woy kono ogkahalin oyow songo igkabogoy rin kanta no mgo Hudiu,” kagi ni Istiban.