MELKAHKA KAN 83:1-13

¹Maing Koht, komw dehr ketin nennenewei; komw dehr ketin sopeimwekid de kupwur meleilei!

²Komw ketin mahsanih! Sapwellimomwi imwintihti kan moromoradahr, oh irail kan me kin kailongkin komwi ar uhwong komwi.

³Re koasoakoasone widing rir suwed kei ong sapwellimomwi aramas akan; re koasoakoasone kaupen irail kan me komw kin ketin sinsile.

⁴Re kin nda, “Nna, kumwail kohdo, kitail en kamwomwala arail wehi, pwe Israel en manukunukla kohkohlahte.”

⁵Re pwungkipenehr ar koasoandi kan oh ehukipenehr ar pahn uhwong komwi:

⁶iei irail mehn Edom oh mehn Ismael kan; mehn Mohap oh mehn Akar kan;

⁷mehn Kepal, mehn Ammon oh mehn Amalek, mehn Pilisdia oh Dair.

⁸Asiria pil iangiraillahr wehi kehlail me kin sewese mehn Ammon oh mehn Mohap, irail kadaudok en Lohd.

⁹Komw ketin wiahiong irail soahngohte me komw wiahiong men Midian ko, oh ong Sisera oh Sapin ni Pillap Kison.

¹⁰Komw ketin kaloweiraildier ni Endor, oh paliwararail ko matala pohn pwehl.

¹¹Komw ketin wiahiong arail sounkaweid kan soahngohte me komw ketin wiahiong Orep oh Seep; komw ketin kalowehdi arail kaun akan koaros duwehte me komw ketin wiahiong Sepa oh Salmuna,

¹²me kahski, “Kitail pahn sapwenikihla sahpw me uhdahn nin limen Koht.”

¹³Maing Koht, komw ketin kamwarakirailpeseng rasehng pwelpar, rasehng diper en tuhke me kisinieng kin ipirpeseng.