Kap 83:1-13

¹Asap dakon kap kɨnda. Kap on Piŋkop gawak ɨmɨm dakon kap. Piŋkop, gak gen mapmɨt dɨma abi. Gak ɨsal dɨma yɨkgi. Piŋkop, gak ɨsal dɨma egɨpbi.

²Pɨndakgi. Uwalgo emat wasaŋek aŋ. Gak do nandaba yokwi tok aŋ amɨn kwen wɨgɨk aŋgamaŋ.

³Uŋun pasɨlɨ egek mɨŋat amɨngo yokwi aŋ yom do gen yaŋ paŋteban aŋ. Gak da mɨŋat amɨngo uŋun kɨlani tagɨsi asal, mani uwal uŋun paŋupbal ak do muwugek gen yoŋ.

⁴Uŋun da yaŋ yoŋ, “Kɨlɨ kɨno! Israel amɨn dapno pasɨl mudaŋakwa, amɨn da saŋbeŋek dɨma nandaŋ yomni.”

⁵Piŋkop, uŋun amɨn gak abɨŋ gep do but kaloŋ aŋ.

⁶Idom amɨn, ae Ismael amɨn, ae Moap amɨn, ae Akri amɨn,

⁷ae Gebal amɨn, ae Amon amɨn, ae Amelek amɨn, ae Pilistia amɨn ae Tair amɨn, uŋun mɨktɨm morap dakon amɨn da yo uŋun ak do nandaŋ.

⁸Siria yo kɨsi uŋun gat muwukgaŋ. Uŋun amɨn tapmɨmɨ toŋ kabɨ uŋun Lot dakon babɨni kabɨ paŋpulugoŋ.

⁹Uŋun amɨn kabɨ da gak aŋupbal ak do but kaloŋ aŋ, do kalɨp Midian amɨn do agɨl, bo pakbi madep Kison uŋudon Sisera amɨn gat Jabin amɨn gat do agɨl yaŋ gɨn uŋun amɨn paŋupbal abi.

¹⁰Uŋun bɨsapmon gak da kokup pap Endo uŋudon paŋupbal abɨ bumjotni mɨktɨmon taŋek mɨktawit.

¹¹Kalɨp kɨla amɨn bamot Orep gat ae Sep garon agɨl uŋudeŋ gɨn emat amɨni dakon mibɨltok amɨni paŋupbal aki. Kɨla amɨn madep bamot Seba gat ae Salmuna garon agɨl uŋudeŋ gɨn kɨla amɨni pabɨŋ yopbi.

¹²Uŋun amɨn da yaŋ yawit, “Piŋkop dakon sipsip upmot mɨktɨmni nin do aŋawatneŋ.”

¹³Piŋkopno, mɨktɨmon kɨmbabaŋ baŋ yaŋ uwalgo wɨrɨrɨkbɨ kɨni. Mɨrɨm da wit dakon gɨpmɨ pɨsoŋba kwaŋ uŋudeŋ wɨrɨrɨkbɨ kɨni.