Mbouŋ To Yes Israela 5:1-8

¹Mbouŋ to David O Yoova, ughur taliŋam pa aliŋag, ve ulooŋ taŋiiz tsiau tane.

²Yo kinik tsiau ve Maaron tsiau. Saawe isov, suŋuuŋ tsiau iŋaŋarui ghom. Tauvene ughur taliŋam pa taŋiiz tsiau tane ve uul ghau.

³Yoova, mboŋoozo ta naol ne, yo uloŋlooŋ avog lutluutu. Ighe nughizau, yau naghurghur ghasoniiŋ tsiau iŋarui ghom, ve naghur matag payo to uul ghau.

⁴Maaron, yo lolom pa ŋgar saghati mako kat. Zeran sasaghatizi irau tileep tomani ghom mako.

⁵Ve zeran pakuruuŋa irau tiyooz ila yo naghom mako. Pasaa, yo ughurghur koi pa tamtamon tisov tau tighamgham ŋgar saghati.

⁶Yes tau avozi karom na, yo ureu zi tilalez. Ve zeran tombanooŋa ve yes tau tiliŋliŋ siŋ pa tamtamon na, yo lolom pazi rigta mako kat.

⁷Eemon yo lolom isaghav ghau ariaaŋ ve uluul ghau itaghon saveeŋ mbuaaŋ tsio. Tauta yau irau naloŋ nalat rumei tsio. Yau naroron payo, ve naput agheg payo ila rumei tsio patabuyaaŋ.

⁸O Yoova, ŋgar tsio, ene iduduuŋ mon. Ugham pooz payau, ve upaghazoŋai ghau pa eez tsio, leso nataghon duduŋaini. Pa koiagŋa tighe tivaghamun ghau.