Mbouŋ To Yes Israela 52:1-8

¹Mbouŋ to David Mbouŋ tane iŋarui saawe tau Doeg tau Edom tamazi na ila ipaes pa Saul ighe David ileep tomania Ahimelek Yo ŋeer ariaŋam, mindai ta aliŋam izazaa, ve upakur ghom pa ŋgar saghati tau ugham pa Maaron tamtamon tooni? Poia, ughamu lak! Eemon saawe isov, Maaron loolo isaghav tamtamon tooni ve iuluul zi. Ŋgar tooni tawe irau isov ne mako.

²Yo ŋeer to karom! Monmon, uiliil eez to uvaghamunia tamtamon. Ve saveeŋ isov tau ivotvot ila avom, ene imin gharghar tau maata kat.

³Ŋgar poia ve saveeŋ onoon, yo lolom pani mako. Ve ŋgar saghati ve saveeŋ karom, yo lolom pani kat.

⁴Yo avom karom. Ve saveeŋ sasaghati naol tau ivaghamunia tamtamon na, yo lolom pani kat.

⁵Tauvene Maaron pale ivaghamun ghom le usaghat kat. Irau uburig muul mako. I pale iloŋ ila ruum tsio loolo, ve isasaar ghom uvot ula muuri, mako ipas ghom ila yes tau matazi yaryaare na sosozi, ve isik ghom uzila nugh to mateegha.

⁶Ŋgar tau Maaron pale igham payo na, ighe zeran duduŋazi tighita, ene pale tiroi. Mako tiŋiŋ payo, ve tisaav tighe:

⁷“Aghita. Ene ŋeer tau loolo pa igham uleeŋ ila to Maaron ve iyooŋ ila tooni mako. I kuaz tauu kat. Ve inumeer gabua tooni naol tawe toman ŋgar tooni saghati ighe pale ighamu ileep poi.”

⁸Eemon yau pale nayooz tuŋia ve naleep malau izi taan, imin ai oliv tau iyooz iloŋ ila Rumei to Maaron sirsiira. Pasaa, yau nanumeer Maaron naghe i pale loolo isaghav tamtamon tooni ve iuul zi taghon taghon gha ila.