SALMOS 52:1-8

¹¡Xijtlacaquili ta tlen timoilhuía para tlahuel tihueyi! ¿Para tlen timohueyimati ica tlen fiero tiquinchihuili itlacajhua Toteco Dios? Toteco Dios quipixtoc iteicnelilis para nochipa.

²Pero ta nochipa timoyolilhuía san tlen fiero tiquinchihuilis sequinoc. Huan nochi istlacayotl tlen quisa mocamaco eli queja se cuchillo tlen tlahuel tlatequi.

³Achi más mitzpactía tijchihuas tlen fiero huan ax tlen cuali. Huan nojquiya achi más mitzpactía istlacayotl huan ax tlen melahuac.

⁴Mitzpactía titeistlacahuis. Huan mitzpactía tiquijtos tlajtoli tlen tecocohua. ¡Tiistlacatica tlacatl!

⁵Yeca Toteco Dios mitztzontlamiltis para nochipa. Mitzhuahuatatzas para mitzquixtis tlen mochaj, huan ayoc tiitztos ipan ni tlaltepactli campa itztoque tlacame.

⁶Nochi tlacame tlen quitlepanitaj Toteco, quiitase tlen yajaya quichihuilis nopa fiero tlacatl, huan momajmatise. Huajca inijuanti quihuetzquilise huan quiijtose:

⁷“Xiquitaca tlen ipantic ne tlacatl tlen ax quitlepanita Toteco Dios. San motemachi ipan itomi huan nochi tlamantli pajpatiyo tlen yajaya quipiya, huan quichijtinenqui tlen ax cuali.”

⁸Pero na cuali niijcatoc queja se olivo cuahuitl, huan Toteco nechyahualohua para nechmocuitlahuis. Na nimotemachía ipan Toteco para yajaya ma nechtlasojtla nochipa.