Mboe 89:5-16

⁵O Yooba, zin wal mburanŋan mi potomŋan ki kar saamba tiwidit urum pa uraata bibip ta kamam na. Zin tiluplup zin mi tipakurkuru pa mbulu ku ta toto sua ku mbukŋana na.

⁶Yooba, nu kadom asiŋ? Som. Pa nu lip pa koroŋ boozomen ta timbotmbot saamba na. Wal saamba kan, kizin tasa irao u som.

⁷Nu mburom ilip kat pa zin wal mburanŋan mi potomŋan ta tiluplup zin su kerem uunu ta saamba a. Tanata timototo u mi timbesmbeeze pu.

⁸Yooba, nu Anutu mburom keskeezeŋom. Merere toro sa kembei nu na som. Pa nu mburom biibi. Mi tortooro ŋgar ku som. Nu toto sua ku mbukŋana pa koroŋ ta boozomen.

⁹Nu ta mborro tai. Sombe duubu zoŋo zirzirŋana, na nu rao be kam ma taun isu.

¹⁰Mi muŋgu nu petepaala Rahab uteene ma imeete. Mi nomom mburaanaŋana ta iyaŋgwiiri kom koi bizin ma tiko papirik.

¹¹Saamba na koroŋ ku. Mi toono tomini, ina koroŋ ku men. Pa nu ta ur saamba mi toono ramaki koroŋ boozomen ta timbotmbot pa.

¹²Nu ur toono ma ila imap su re uunu, mi ila imap su iwaara uunu. Abal Tabor mi abal Hermon lelen ambai pu mi timbombo mboe be tipakur zom.

¹³Nu mburom keskeezeŋom. Nomom woono na, mburaana ilip kat be ikas kom koi bizin.

¹⁴Peeze ku, ina imender se mbulu ku ta urpewe pataŋana kizin tomtom mi kamam mbulu ndeeŋeŋana men. Mi mbulu ku ta boozomen izzwe kembei: Nu toto sua ku mbukŋana mi urur lelem pa wal ku.

¹⁵Yooba, zin wal ta tiluplup zin pa suŋŋana, mi kalŋan izalla ma tipakurkuru na, menmeen zin. Pa wal ta kembei tipa pai kizin pa mat ku leleene, tana nu mbotmbot raama zin mi kampewe zin.

¹⁶Zin tiute mbulu ta kamam na. Tana aigule ta boozomen, zoŋ ise ma ila zoŋ isula na, lelen ambai kat, mi tipakurkuru pa mbulu ku ndeeŋeŋana.