Mboe 84:1-9

¹Mboe kizin Kora O Yooba, nu mburom keskeezeŋom. Nio leleŋ pa urum ku ilip. Pa ina nu itum murim tau.

²Nio leleŋ ilip kat be aŋbotmbot lela urum ku leleene. Mi iŋgi aŋbot molo pa. Tana aŋtwermiili pa mi aŋso: “A tina ko!” Pa nu Anutu motom yaryaaraŋom. Tana ŋgar tio mi leleŋ ta imap imama ku men.

³Yooba, nu mburom keskeezeŋom. Nu ta king tio mi Anutu tio. Zin man ta timbotmbot lela urum ku leleene na, lelen ambai kat. Mi yaŋnaana tiwwo len ŋgini lela urum ku lene be tikenne pa. Mi timborro lutun bizin kolouŋana pa artaal ku.

⁴Zin wal tau timbotmbot lela urum ku leleene totomen na, lelen ambai kat pa kampeŋana biibi tana. Tana timbombo mboe mi tipakurkuru.

⁵Mi zin wal ta tipase pu be pombol zin, mi ŋgar kizin imbol be tito zaala tabe isama pa abal Sion na, zin tomini lelen ambai kat pa kampeŋana ku ta ise kizin.

⁶Zin sombe tiwwa ma tisula pa lele ŋgolooboŋana ki Baka ta ka yok somŋana i, nako yok boozomen bukbuk ma tise, mi tirereere. Mi Anutu ko ikampe lele tana, mi ikam yaŋ ma isu bekena lele tana ipiyooto koroŋ ndabokbokŋan boozo.

⁷Tana zin tiwwa ma tila, mi mburan iwedet ma iwe biibi, mi tila tipet Anutu kereene uunu ta Sion a.

⁸O Yooba, nu Anutu mburom keskeezeŋom. Leŋ suŋŋana tio. Anutu ki Yakop, ŋgun talŋom pio.

⁹Anutu, motom pa king tiam mi kampe i. Pa nu itum roogi mi uri pa uraata kini. Mi ni ta iwe siŋgiao piam.