Mboe 78:59-70

⁵⁹Ni ire mbulu kizin tana, to keteene ibeleu mi ipizil kat ndemeene pizin.

⁶⁰Tana izem beeze kini potomŋana ta imbot kar Silo na, ma imborene. Itunu muriini ta imbotmbot la wal kini mazwan na, leleene be imbot pa mini som.

⁶¹Mi Sua Mbukŋana Ka Koror ta iwe kin pa mburaana mi azuŋka kini, ina ni izem ila kan koi bizin naman.

⁶²Zin Israel na, wal kini ŋonoono. Tamen ni keteene ibeleu kat pizin. Tana izem zin mi kan koi bizin tikas zin pa buza.

⁶³Kete malmalŋana kini ikan zin naŋgaŋ kaibiim kizin kembei ta you ma timetmeete pa malmal ma timap. Tabe tamuriŋ kizin kan tomooto sa be tiwoolo zin som, mi timbombooren sorok.

⁶⁴Mi wal patoronŋana kan na, tiŋgal zin pa buza ma timetmeete. Mi nora kizin titaŋ pizin som.

⁶⁵To Anutu imaŋga, kembei tomtom ta ikeene ma imaŋga mi mataana iyaara. Ikam kembei tomtom mbolŋana ki malmal ta iwin ma ikeene, to imaŋga ma mataana ikam pak.

⁶⁶Pa imaŋga pa ka koi bizin, mi iketo zin ma timiili ma tila len raama kan miaŋ. Mi kan miaŋ tana ko imbotmbot ma alok.

⁶⁷To Anutu ipizil ndemeene pa wal ki Eparaim, ta popoŋana ki Yosep na. Kaimer ipeikat zin pa uraata kini biibi sa mini som.

⁶⁸Mi ipeikat popoŋana ta ki Yuda i, mi ikam abal Sion ma iwe lene. Abal tana, ni leleene pa ilip.

⁶⁹Mi ipo urum kini potomŋana isala be iwe itunu muriini. Urum tana imbot sala kor kat. Mi uunu ko imbol ma imbotmbot ma alok, kembei ta toono ta ni iur na.

⁷⁰Mi ipeikat mbesooŋo kini Dabit. Indeeŋe Dabit imbotmbot siiri kizin sipsip mi imborro zin na, Anutu ikami pa uraata kini.