Mboe 51:7-19

⁷Ziiri sanaana tio ma ila lene. Naso leleŋ iŋgalaŋ. Ŋguuru yo ma leleŋ iŋgeeze kat.

⁸Kam mbulu sa tabe iswe kembei: Nu reege sanaana tio kek. Naso leleŋ ambai mini mi menmeen yo. Nu ŋgal motoŋ pa sanaana tio ma motoŋ siŋiini isu. Kam ma menmeen yo mini.

⁹Motom mbiriizikaala mbulu tio boozomen ta irao pa nu motom som na. Mbulu ta aŋkam ŋoobo na, mus ma ila lene.

¹⁰Anutu, ur ŋgar popoŋana ta iŋgeeze men sula leleŋ, mi pombol yo. Naso aŋmender mbolŋana mi aŋkiskis mbulu ku.

¹¹Ziiri yo pa kerem uunu pepe. Mi tatke Bubuŋom Potomŋana pio pepe.

¹²Ulaaŋa ta muŋgu kakamam pio na, leleŋ be aŋre mini. Naso leleŋ ndabok kat. Mi pombol yo be motoŋ leŋleŋ pu.

¹³Tonabe aŋpaute zin wal zorzooroŋan pa zaala ku. Mi zin wal ta mbulu kizin irao pa nu motom som, nako titooro lelen ima ku mini.

¹⁴Anutu, nu ulaaŋa tio. Sanaana tio na biibi kat. Irao aŋmeete pa. Tana kamke yo, mi reege ma ila ne. Naso leleŋ ambai kat, mi kalŋoŋ isala mi aŋpakuru pa mbulu ku ndeeŋeŋana.

¹⁵Iŋgi koŋ miaŋ pa sanaana tio ma aŋmaane men. Tana paraurau kwoŋ be aŋso sua. Naso aŋwe kwom mi aŋpakur zom.

¹⁶Anutu, sombe lelem be aŋpatoronu pa koroŋ sa, so aŋkam. Mi sombe lelem be aŋneene mbili sa ma iwe patoronŋana pu, so aŋneene. Tamen patoronŋana ta kembei na, nu lelem pa som.

¹⁷Pa patoronŋana ta nu lelem pa ilip, ina ta kembei: Bela aŋkoto ituŋ, mi leleŋ ipata pa sanaana tio. Pa tomtom ta so iyamaana itunu kembei mbulu kini irao pa nu motom som, mi leleene ipata pa sanaana kini, na nu ko tit ndomoono na som.

¹⁸Anutu, kampe kar Sion mi uulu wal ku. Urpe siiri mbolŋana ki Yerusalem ma imender mini.

¹⁹Tonabe amkam mini patoronŋana tabe indeeŋe men pa nu motom. Ko amyo makau ma amneene zin isala artaal ku be ampatoronu pa. Mi nu ko re ma lelem ambai.